الطاف حسین کا ڈرون حملہ قوم کے لئے خوشگوار حیرت ثابت ہوگا فاروق ستار

عدالت عظمیٰ اور تمام جج صاحبان کے شکر گزار ہیں کہ انہوں نے الطاف حسین کی معافی قبول کرتے ہوئے ان کے خلاف توہین عدالت کا نوٹس خارج کردیا،فاروق ستار فوٹو:اے ایف پی

---

ایم کیو ایم کے رہنما ڈاکٹر فاروق ستار نے کہا ہے کہ ایم کیوایم نے ہمیشہ قانون کی حکمرانی کے لئے جدوجہد کی ہے، الطاف حسین کا ڈرون حملہ قوم کے لئے خوشگوار حیرت ثابت ہوگا۔

سپریم کورٹ کے باہر میڈیا سے گفتگو کرتے فاروق ستار نے کہا کہ ایم کیوایم کی قیادت کو اس بات کا پوری طرح احساس ہے کہ اس وقت پاکستان کو کس طرح کے مسائل درپیش ہیں اور ان کو کس طرح حل کرنا چاہئے۔ انہوں نے کہا کہ الطاف حسین کی جانب سے بڑے پن اور کشادہ دلی کا مظاہرہ کیا گیااگر سیاسی قائدین عوام سے خطاب کرتے ہوئے ایسے الفاظ اپنے خطاب میں استعمال کرتے ہیں جس سے ملک کے وقار اور احترام میں کمی آتی ہو تو یہ اپنے الفاط پر نظرثانی کرنے کا بہترین راستہ ہے۔

فاروق ستار نے کہا ہم عدالت عظمیٰ اور تمام جج صاحبان کے شکر گزار ہیں کہ انہوں نے الطاف حسین کی معافی قبول کرتے ہوئے ان کے خلاف توہین عدالت کا نوٹس خارج کردیا، ان کا کہنا تھا کہ آج ایک اچھا دن ہے ہمیں آگے کی طرف دیکھنا چاہئے، الطاف حسین کا ڈرون حملہ قوم کے لئے خوشگوار حیرت ثابت ہوگا، خوشگوار تحفے دینا ایم کیو ایم کی روایت ہے۔

اس موقع پر بیرسٹر فروغ نسیم نے کہا کہ ایم کیوایم نے عدالت میں کراچی میں نئی حلقہ بندیوں کے حوالے سے نظرثانی کی 2 درخواستیں دائر کی ہیں جس میں سے ایک کی سماعت 9 جنوری کو ہوگی۔