لندن ایئرپورٹ پر اداکارہ لنڈسے لوہان کا مسلم اسکارف پہننا جرم بن گیا

ائیرپورٹ پر سیکیورٹی اہلکاروں نے نام جاننے کے بعد مجھ سے معذرت کی لیکن اسکارف اتارنے کا کہا گیا، ہالی ووڈ اداکارہ

ویب ڈیسک February 24, 2017

ہالی ووڈ کی معروف اداکارہ لنڈسے لوہان کا ترکی سے نیویارک جاتے ہوئے لندن کے ہیتھرو ایئرپورٹ پر اسکارف اتروا دیا گیا۔

ہالی ووڈ اداکارہ لنڈسے لوہان کی قبول اسلام کی خبریں مسلسل آتی رہتی ہیں جس کے باعث انہیں شدید تنقید کا سامنا کرنا پڑتا ہے جب کہ اداکارہ کے ترکی میں شامی پناہ گزینوں کے کیمپ میں اسکارف پہن کر جانے پر بھی مغربی میڈیا نے طوفان کھڑا کردیا تھا لیکن اب لندن کے ایئر پورٹ پر انہیں نسلی تعصب کا سامنا کرنا پڑا ہے۔

اس خبر کو بھی پڑھیں: لنڈسے لوہان کی قبول اسلام سے متعلق قیاس آرائیاں

ایک ٹی وی شو میں بات کرتے ہوئے ہالی ووڈ اداکارہ لنڈسے لوہان کا کہنا تھا کہ ترکی سے نیویارک جاتے ہوئے جب لندن کے ہیتھرو ائیرپورٹ پر رکی تو وہاں کے عملے نے مجھے روک لیا، سیکیورٹی اہلکاروں کی جانب سے میرے ساتھ نسلی تعصب برتا گیا جب کہ پاسپورٹ چیک کرنے پر میرا نام پڑھنے کے بعد اہلکاروں نے مجھ سے معذرت کی لیکن اسکارف اتارنے کا کہا گیا۔

اس خبر کو بھی پڑھیں: لنڈسے لوہان حجاب پہننے پربھی تنقید کی زد میں آگئیں

اداکارہ نے کہا کہ اس طرح کا عمل میرے ساتھ زندگی میں پہلی بار ہوا ہے جس کے باعث میں دوسری خواتین کے بارے میں سوچ کر خوفزدہ ہوگئی تھی جن کے ساتھ عوامی مقامات پر یہ سب کیا جاتا ہے۔