فائنل میں جو کھلاڑی پاکستان نہیں آئے گا اس کا متبادل دیکھیں گے نجم سیٹھی

پی ایس ایل کی کامیابی کےبعد پوری دنیا کوبتائیں گے کہ ہم بلیک میل نہیں ہوں گے دہشتگردی کو شکست دیں گے،نجم سیٹھی ۔ فوٹو: فائل

---

پاکستان سپر لیگ کے چیئرمین نجم سیٹھی کا کہنا ہے کہ آسٹریلیا، انگلینڈ اور بنگلادیش کے کھلاڑی پاکستان آرہے ہیں تاہم اگرکوئی کھلاڑی پاکستان آنے کے لیے تیار نہ ہوا تو اس کا متبادل دیکھیں گے۔

لاہور میں میڈیا سے بات کرتے ہوئے نجم سیٹھی نے کہا کہ آج سے فائنل میچ کی ٹکٹوں کی فروخت شروع ہوگی اور ٹکٹ 500 روپے سے 12 ہزار تک ہوگی۔ انہوں نے کہا کہ قوم نے جرات اور بہادری دکھائی ہے جب کہ میڈیا کی سپورٹ کے بغیر یہ کام مکمل نہیں ہوسکتا تھا۔

اس خبر کو بھی پڑھیں :پاکستان سپر لیگ کا فائنل لاہور میں ہی ہوگا

نجم سیٹھی کا کہنا تھا کہ پی ایس ایل کی کامیابی کے بعد پوری دنیا کو بتائیں گے کہ ہم بلیک میل نہیں ہوں گے، دہشت گردی کو شکست دیں گے، پاکستان قوم دکھانا چاہتی ہے کہ ہم پر امن لوگ ہیں۔ انہوں نے کہا کہ آسٹریلیا، انگلینڈ اور بنگلادیش کے کھلاڑی پاکستان آرہے ہیں، اللہ کرم کرے اور تمام کھلاڑی آنے کے لیے تیارہوجائیں تاہم آج دبئی جا رہا ہوں جہاں کھلاڑیوں سے بات کروں گا اگرکوئی کھلاڑی پاکستان آنے کے لیے تیار نہ ہوا تو اس کا متبادل دیکھیں گے۔