کنگنا کے ساتھ کام کرنے سے کبھی انکار نہیں کیا شاہ رخ خان

خبر تھی کہ شاہ رخ خان نے سنجے لیلا کی فلم میں کام سے اس لیے انکار کردیا تھا کیونکہ اس میں کنگنا بھی شامل تھیں فوٹو: فائل

---

اگر بالی ووڈ کے کنگ شاہ رخ خان ہیں تو کنگنا رناوت کو بی ٹاؤن کی کوئن کہا جاتا ہےلیکن اسے اتفاق کہیں یا پھر پھر کچھ اور کہ بادشاہ اور ملکہ نے کبھی بھی ایک ساتھ بڑے پردے پراپنا رنگ نہیں جمایا اسی تناظرمیں یہ کہا جاتا ہے کہ شاہ رخ خان نے ایک فلم میں کنگنا کے ساتھ کام کی پیشکش ٹھکرا دی ہے تاہم کنگ خان اس کی تردید کرتے ہیں۔

کچھ عرصہ قبل بالی ووڈ میں یہ خبریں گرم تھیں کہ شاہ رخ خان نے معروف ہدایت کار سنجے لیلا بنھسالی کی ایک فلم میں کام کرنے سے اس لیے انکار کردیا کیونکہ اس میں ان کے مدمقابل کنگنا رناوت اہم کردار ادا کررہی تھیں تاہم اب کنگ خان نے اس کی تردید کردی ہے۔

ممبئی میں ایک ایوارڈ تقریب کے دوران جب شاہ رخ خان سے اداکارہ کنگنا رناوت کے ساتھ سنجے لیلا بھنسالی کی فلم میں کام نہ کرنے کی وجہ پوچھی گئی تو ان کا کہنا تھا کہ اس قسم کی کسی خبر میں کوئی سچائی نہیں اور وہ اس کی تردید کرتے ہیں، ان کے مداح بھی اس قسم کی کسی بات پر بالکل بھروسہ نہیں کریں۔

اس خبرکو بھی پڑھیں: کنگنا کو سیف اور شاہد کے ساتھ کام کرنے پر فخر

شاہ رخ خان کا پروڈکشن ہاؤس معروف ہدایت کار و فلسماز یش چوپڑا کی 1969 میں ریلیز ہونے والی فلم ''اتفاق '' کا ری میک بنارہا ہے۔ اس حوالے سے کنگ خان کا کہنا تھا کہ فلم میں سوناکشی سنہا اور سدھارتھ ملہوترا مرکزی کردار ادا کررہے ہیں، وہ بھی اس فلم کا حصہ بننا چاہتے تھے لیکن مصروفیت کی وجہ سے ایسا نہ ہوسکا۔