پی ایس ایل فائنل کیلئے پشاور زلمی کے غیر ملکی کھلاڑی لاہور آئیں گے جاوید آفریدی

پشاور زلمی کے تمام غیر ملکی کھلاڑیوں کو پاکستانی ویزے بھی جاری ہو چکے ہیں، جاوید آفریدی۔ فوٹو: سوشل میڈیا

---

پاکستان سپر لیگ کا دوسرا ایڈیشن جیسے جیسے اپنے اختتام کی جانب جا رہا ہے اس کی چمک دھمک بھی بڑھتی جا رہی ہے اور اب کرکٹ شائقین کے لئے بڑی خوشخبری یہ ہے کہ پشاور زلمی کے تمام غیر ملکی کھلاڑی پاکستان میں کھیلنے کے لئے آمادہ ہو گئے ہیں اور انہیں پاکستانی ویزے بھی جاری کر دیئے گئے ہیں۔

پشاور زلمی کے مالک جاوید آفریدی نے اپنے ویڈیو پیغام میں بتایا کہ پشاور زلمی کے کپتان ڈیرن سیمی سمیت پانچوں غیر ملکی کھلاڑیوں کو پاکستان جانے پر رضامند کر لیا گیا ہے، ان کھلاڑیوں کو پاکستانی ویزے بھی مل گئے ہیں، ٹیم کے غیرملکی کھلاڑیوں میں کپتان ڈیرن سیمی، مارلن سیمویلز، کرس جارڈن، ڈیوڈ ملن اور سمت پٹیل شامل ہیں۔

اس خبر کو بھی پڑھیں: پشاور زلمی کے غیر ملکی کھلاڑی فائنل میں رسائی پر لاہور آنے کو تیار ہیں، شاہدآفریدی

جاوید آفریدی کا کہنا تھا کہ پشاور زلمی کراچی کنگز کے خلاف میچ جیت لیتی ہے تو ان کی ٹیم کے تمام کھلاڑی لاہور میں کوئٹہ کے خلاف فائنل کھیلیں گے۔

اس خبر کو بھی پڑھیں: کوئٹہ گلیڈی ایٹرز کے غیر ملکی کرکٹرز کا فائنل کیلیے لاہور آنے سے انکار

دوسری جانب کوئٹہ گلیڈی ایٹرز کے تمام غیر ملکی کھلاڑیوں نے پی ایس ایل کے فائنل میں شرکت سے معذرت کر لی ہے تاہم انہوں نے اپنی ٹیم کی فائنل میں جیت کے لئے نیک تمناؤں کا اظہار کیا ہے۔