پی ایس ایل کے فائنل نے رشی کپور کو بھی بیتاب کردیا

بھارت میں پاکستانی چینلز پرپابندی کی وجہ سےمیچ نہیں دیکھ سکتا تاہم امیدکرتاہوں بہترین ٹیم کامیاب ہوگی، رشی کپورکی ٹوئٹ فوٹو: فائل)

---

لاہور: پاکستان سپر لیگ کے فائنل نے بالی ووڈ کے لیجنڈری اداکار رشی کپور کو بھی بیتاب کردیا۔

پاکستان سپر لیگ کا سحر پاکستانیوں ہی نہیں بلکہ بھارتیوں پر بھی سر چڑھ کر بول رہا ہے جب کہ نامور بھارتی کھلاڑیوں اور بالی ووڈ اسٹارز بھی پی ایس کے بخار میں مبتلا ہیں اس کا اندازہ اس بات سے لگایا جاسکتا ہے کہ بھارت کے لیجنڈری اداکار رشی کپور پی ایس ایل کا فائنل دیکھنے کے لیے بیتاب رہے لیکن بھارتی حکومت کی جانب سے پاکستانی چینلز پر پابندی کے باعث میچ نہ دیکھ سکے.

اداکار نے سماجی رابطے کی ویب سائٹ ٹوئٹر پر ٹوئٹ کرکے پی ایس ایل نشر کرنے والے چینل سے متعلق معلومات حاصل کیں تاہم پابندی کے باعث میچ سے لطف اندوز نہ ہوسکے۔

Anyone know which Channel PSL telecasting? Any wise cracks and you are blocked

— Rishi Kapoor (@chintskap) March 5, 2017

رشی کپور کا اپنی ٹوئٹ میں کہنا تھا کہ کیا کوئی جانتا ہے کہ کون سا چینل پی ایس ایل نشر کررہا ہے؟ جب کہ اس کے بعد ایک اور ٹوئٹ میں کہا پی ایس ایل کی ٹیلی کاسٹ سے متعلق معلومات کی فراہمی کا شکریہ لیکن مسئلہ یہ ہے کہ میں پابندی کی وجہ سے میچ نہیں دیکھ سکتا تاہم امید کرتا ہوں بہترین ٹیم کامیاب ہوگی۔

PSL. Thank you for genuine info on the telecast. Bottom line is-Cannot see it. So may the best team win!

— Rishi Kapoor (@chintskap) March 5, 2017

دوسری جانب اداکار کی جانب سے پاکستان سپر لیگ دیکھنے کی خواہش کے اظہارپر انہیں انتہا پسند ہندوؤں کی جانب سے سوشل میڈیا پر شدید تنقید کا سامنا ہے جب کہ بعض نے انہیں تمسخر کا نشانہ بھی بنایا تاہم پاکستانی مداحوں کی جانب سے لیجنڈری اداکار کے جذبے کو سراہا جارہا ہے۔