بھارتی ریاست چھتیس گڑھ میں ماؤ مزاحمت کاروں کا حملہ 11 اہلکار ہلاک

ماؤ نواز مزاحمت کار بھارتی سرکار کے خلاف مقامی قبائلیوں اور کسانوں کے حق کے لیے لڑ رہے ہیں۔ فوٹو: فائل

---

بھارتی ریاست چھتیس گڑھ میں ماؤ مزاحمت کاروں کے حملے میں 11 سیکیورٹی اہلکار ہلاک ہوگئے ہیں۔

غیر ملکی خبر ایجنسی کے مطابق بھارتی ریاست چھتیس گڑھ کے ضلع سکما میں مسلح افراد نے بھارتی فوج کے کمانڈوز کی گاڑی کو اس وقت نشانہ بنایا جب وہ ایک سڑک کی تعمیر پر مامور مزدوروں اور انجینروں کو تحفظ فراہم کررہے تھے۔ حملے کے بعد مسلح افراد فوجیوں کا اسلحہ اور ان کے مواصلاتی آلات لے کر فرار ہوگئے۔

ڈی آئی جی پولیس سندراج پی نے واقعے کی تصدیق کرتے ہوئے کہا کہ سینٹرل ریزرو پولیس فورس کے کمانڈوز پر حملے میں ماؤ مزاحمت کار ملوث ہیں، حملے میں 11 اہلکار ہلاک ہوئے جب کہ 3 کی حالت تشویشناک ہے۔

واضح رہے کہ کشمیر کے علاوہ چھتیس گڑھ، اڑیسہ، منی پور اور اس سے ملحقہ کئی دیگر بھارتی ریاستوں میں بھی علیحدگی پسند تحریکیں جاری ہیں، ماؤ نواز مزاحمت کار بھی شامل ہیں جن کا کہنا ہے کہ وہ بھارتی سرکار کے خلاف مقامی قبائلیوں اور بے زمین کسانوں کے حق کے لیے لڑ رہے ہیں۔