کوئٹہ میں بے قابو ڈمپر مکان میں جا گھسا 2 بچیوں سمیت 7 افراد جاں بحق

حادثہ ڈبل روڈ کے علاقے میں پیش آیا جہاں ڈمپر کچی آبادی میں واقع گھر میں جاگھسا، فوٹو : ایکسپریس

---

ڈبل روڈ پر تیز رفتار ڈمپر مکان سے جا ٹکرایا جس کے نتیجے میں مکان کی چھت گرنے سے 2 بچیوں سمیت 7 افراد جاں بحق ہوگئے۔

کوئٹہ کےعلاقے ڈبل روڈ پر تیز رفتار بے قابو ڈمپر مکان میں جا گھسا جس کے نتیجے میں مکان کی چھت زمین بوس ہوگئی اور اس میں رہائش پذیر کئی افراد ملبے تلے دب گئے، حادثے کے بعد اہل علاقہ نے اپنی مدد آپ کے تحت امدادی کارروائیاں شروع کردیں جب کہ حادثے کے کچھ دیر بعد ریسکیو ٹیمیں بھی جائے حادثہ پہنچ گئیں۔

ریسکیواہلکاروں نے مکان کے ملبےسے 2 بچیوں سمیت 6 افراد کی لاشیں نکال لیں اور 2 زخمیوں کو بھی نکال کر طبی امداد کے لیے اسپتال منتقل کردیا گیا جہاں ایک زخمی زخموں کی تاب نہ لاتے ہوئے چل بسا، جب کہ اندھیرے کے باعث امدادی کارروائیوں میں مشکلات کا سامنا کرنا پڑا ۔نمائندہ ایکسپریس کے مطابق عینی شاہدین نے بتایا کہ گھر میں 8 سے 10 افراد موجود تھے جس میں مرد، خواتین اور بچے بھی شامل ہیں جن کی تلاش کے لیے ریسکیو آپریشن جاری ہے۔