کرپشن میں ملوث پاسپورٹ آفس کراچی کے اسسٹنٹ ڈائریکٹر گرفتار

گرفتاراسسٹنٹ ڈائریکٹر پرغیرملکیوں سے ویزا توسیع کے لئے رشوت لینے کا الزام ہے،فوٹوؒ:فائل

---

وفاقی تحقیقاتی ادارے (ایف آئی اے) نے وزارت داخلہ کے حکم پر کرپشن میں ملوث پاسپورٹ آفس کراچی کے اسسٹنٹ ڈائریکٹر کو گرفتار کرلیا۔

ایکسپریس نیوز کے مطابق وفاقی وزیرداخلہ چوہدری نثار علی خان کے حکم پر ایف آئی اے نے کارروائی کرتے ہوئے پاسپورٹ آفس کراچی کے اسسٹنٹ ڈائریکٹر اور ایک اہلکار کو کرپشن الزامات پر گرفتار کرلیا۔ گرفتار ملزمان پرغیرملکیوں سے ویزا توسیع کے لئے رشوت لینے کے الزامات ہیں جنہیں حراست میں لینے کے بعد تحقیقات کا آغاز کردیا گیا۔

دوسری جانب وفاقی وزیرداخلہ نے ایف آئی اے کو ہدایت کی ہے کہ گرفتار ملزمان سے کرپشن کی رقم وصول کر کے تحقیقات کا دائرہ کار بڑھایا جائے اور دیگر ملزموں کی بھی نشاندہی کی جائے۔ کرپشن کیس سامنے آنے کے بعد محکمہ پاسپورٹ سے ویزوں کی مدت میں خاص حد تک توسیع کا صوابدیدی اختیار بھی واپس لے لیا گیا ہے۔