سنیل گروور نے ’’دی کپل شرما شو‘‘ چھوڑ دیا

سنیل گروور کے قریبی دوست نے بھی ان کے شو چھوڑنے کی تصدیق کردی، فوٹو؛ فائل

---

بھارت کے معروف کامیڈین سنیل گروور نے کپل شرما کے ساتھ گزشتہ دنوں پیش آنے والے واقعے کے بعد ''دی کپل شرما شو'' چھوڑ دیا۔

گزشتہ دنوں کپل شرما شراب کے نشے میں دھت آسٹریلیا سے واپسی پر دوران پرواز ساتھی اداکاروں سنیل گروور اور چندن سے الجھ پڑے تھے جس کے بعد سے دونوں اداکاروں میں تناؤ جاری ہے جب کہ کپل شرما سماجی رابطے کی ویب سائٹ ٹوئٹر پرمعافی بھی مانگ چکے ہیں لیکن اب شو میں جان ڈالنے والے سنیل گروور نے بڑا فیصلہ لے لیا ہے۔

اس خبر کو بھی پڑھیں:کپل شرما دوران پروازساتھی اداکار سنیل گروور سے لڑ پڑے

بھارتی میڈیا رپورٹس کے مطابق مشہور کامیڈی شو''دی کپل شرما شو'' میں ڈاکٹر مشہو گلاٹی، رنکو بھابھی اورپدو کا کردار کرنے والے سنیل گروور نے کپل شرما کے ساتھ کام کرنے سے انکار کردیا ہے اور ساتھ ہی شو کو بھی خیر باد کہہ دیا ہے جب کہ سنیل ٹی وی چینل سے اپریل تک معاہدے کی وجہ سے وہ شو میں پرفارم کریں گے جس کے بعد وہ مزید کوئی نیا معاہدہ نہیں کریں گے۔

دوسری جانب سنیل گروور کے قریبی دوست نے بھی اداکار کے شو چھوڑنے کے فیصلے کی تصدیق کرتے ہوئے کہا کہ سنیل چینل کی جانب سے معاوضہ بڑھانے کی صورت میں بھی شو میں واپسی کا ارادہ نہیں رکھتے ہیں اور ٹی وی چینل سے معاہدہ پورا ہونے کے بعد شو میں نظر نہیں آئیں گے۔

اس خبر کو بھی پڑھیں:کپل شرما سے لڑائی کے بعد سنیل گروور نے شو چھوڑنے کا عندیہ دیدیا

واضح رہے کہ کپل شرما شراب کے نشے میں دھت دوران پرواز سنیل گروور سے دست و گریباں ہوگئے تھے اورسنیل مغلظات بکی تھیں۔