طاہرالقادری ماورائے آئین مطالبہ کر رہے ہیں قمر زمان کائرہ

وزیر اطلاعات قمر زمان کائرہ نے کہا ہے کہ ڈاکٹر طاہر القادری ماورائے آئین مطالبہ کر رہے ہیں، الیکشن کمیشن کو آئین کے مطابق ہی ہٹایا جاسکتا ہے۔

اسلام آباد میں پریس کانفرنس کرتے ہوئے قمر زمان کائرہ نے کہا کہ وقت کے ساتھ طاہرالقادری کے مطالبات بھی بدلتے رہتے ہیں۔ انہوں نے کہا کہ ہم نے بھی تحریکیں چلائی ہیں، پھانسی پر بھی چڑھے ہیں لیکن ہماری جدوجہد آئین کی بحالی کے لئے تھی آئین کو سبوتاژ کرنے کے لئے نہیں ۔

قمر زمان کائرہ کا کہنا تھا کہ جب نگراں حکومت بنانے کا وقت آئے گا تو سب سے مشاورت کی جائے گی فی الحال سب یہ سوچ رہے ہیں کہ لانگ مارچ کا اخلاقی جواز کیا ہے۔ طاہرالقادری اگر نظام میں تبدیلی چاہتے ہیں تو اپنا منشور لے کر عوام کے پاس جائیں اور اقتدار میں آکر تبدیلی لائیں۔