کراچی پر وہ لوگ قابض ہیں جن کے پاس شہر کا مینڈیٹ ہی نہیں وسیم اختر

میئر كراچی وسیم اختر کا کہنا ہےکہ بدقسمتی سے اس شہر پر وہ لوگ قابض ہیں جن كے پاس خود كراچی كا كوئی مینڈیٹ نہیں۔

کراچی کے مقامی ہوٹل میں تیسری عالمی كانفرنس برائے ماحولیات، صحت اور تحفظ سے بحیثیت مہمان خصوصی خطاب كرتے ہوئے وسیم اختر نے کہا کہ ماسٹر پلان، واٹر بورڈ، ٹرانسپورٹ، بلڈنگ كنٹرول اتھارٹی، سالڈ ویسٹ مینجمنٹ بورڈ حكومت سندھ كے پاس ہے، لاڑكانہ، میرپور خاص، نواب شاہ، سیہون سب كا برا حال ہے، ہمارے پاس تجربے كار اور باصلاحیت ٹیم ہے اس ٹیم كو استعمال كریں اور كراچی كے مسائل حل كریں، بدقسمتی سے اس شہر پر وہ لوگ قابض ہیں جن كے پاس خود كراچی كا كوئی مینڈیٹ نہیں۔


میئر کراچی نے کہا کہ دنیا میں سب سے مضبوط بلدیاتی حكومت ہوتی ہے، وزیراعلیٰ سندھ كو كراچی كے مسائل كے حل كے لیے درخواستیں بھیجیں، آج تك جواب نہیں آیا، ہم چاہتے ہیں كہ وہ كامیاب ہوں مگر پیپلزپارٹی كے لوگوں كے بھی ہاتھ باندھے ہوئے ہیں۔ انہوں نے کہا کہ سندھ میں جو ٹیكس وصول ہورہا ہے وہ صرف كراچی كے شہری دے رہے ہیں، وڈیرے ٹیکس نہیں دے رہے۔

وسیم اختر کا کہنا تھا کہ كراچی عمارتوں كا جنگل بن گیا ہے، لوكل گورنمنٹ كو جو ملنا چاہیے تھا وہ نہیں مل رہا، كراچی اس كی سزا بھگت رہا ہے جب عوام كو كوئی نہ دیكھے تو انہیں خود اپنے حقوق كے لیے اٹھنا پڑے گا۔