بانی ایم کیو ایم اور دیگر رہنماؤں کے مختلف مقدمات میں ایک بار پھر وارنٹ گرفتاری جاری

جج کی رخصت کے باعث فیصلہ نہ سنایا جاسکا اورمقدمے کی سماعت 7 اپریل تک ملتوی کردی گئی: فوٹو : فائل

---

مختلف ماتحت عدالتوں نے بانی ایم کیوایم الطاف حسین اور ایم کیوایم پاکستان کے سربراہ فاروق ستار سمیت کئی رہنماؤں کے مختلف مقدمات میں ناقابل ضمانت وارنٹ گرفتاری جاری کردیے ہیں۔

انسداد دہشت گردی عدالت میں اشتعال انگیز تقاریر میں سہولت کاری کیس کی سماعت ہوئی۔ ایم کیوایم لندن اورپاکستان کےرہنماؤں کی درخواست ضمانت پر فیصلہ مؤخر ہوگیا اور جج کی رخصت کے باعث فیصلہ نہ سنایا جا سکا۔ عدالت نے مقدمے میں نامزد بانی متحدہ ،ایم کیو ایم پاکستان کے سربراہ فاروق ستار، خوش بخت شجاعت، جنید لاکھانی، محفوظ یارخان، قمرمنصور، ساتھی اسحاق، امجد اللہ و دیگر کے ایک بار پھر وارنٹ گرفتاری جاری کرتے ہوئے مقدمے کی سماعت 7 اپریل تک ملتوی کردی۔

اس خبرکوبھی پڑھیں: بانی ایم کیوایم سمیت 20 رہنماؤں کے ناقابل ضمانت وارنٹ گرفتاری جاری

دوسری جانب جوڈیشل مجسٹریٹ شرقی کی عدالت میں بانی ایم کیو ایم اور دیگر رہنماؤں کے خلاف لاؤڈ اسپیکر ایکٹ کی خلاف ورزی سے متعلق مقدمے کی بھی سماعت ہوئی۔ عدالت نے عدم پیشی پر فاروق ستار،حیدر عباس رضوی،فیصل سبزواری اور کنورنوید سمیت دیگر رہنماؤں کے ناقابل ضمانت وارنٹ جاری کردیے۔ عدالت نے ملزمان کو گرفتار کرکے پیش کرنے کا حکم دیتے ہوئے سماعت 20 اپریل تک ملتوی کردی۔

اس خبرکوبھی پڑھیں: بانی ایم کیو ایم کے ایک بارپھرناقابل ضمانت وارنٹ گرفتاری جاری

واضح رہے کہ ملزمان کےخلاف اشتعال انگیز تقریر میں سہولت کاری کا الزام ہے اور ان کے خلاف عزیز آباد سمیت دیگر تھانوں میں مقدمات درج ہے۔