پاناما کیس میں وزیر اعظم عدالت کا فیصلہ قبول کریں گے اسپیکر قومی اسمبلی

اسپیکر قومی اسمبلی سردار ایاز صادق کا کہنا ہے کہ وزیر اعظم کہہ چکے ہیں وہ عدلیہ کا احترام کرتے ہیں اور پاناما کیس میں عدالتی فیصلہ مانیں گے۔

لاہور میں میڈیا سے بات کرتے ہوئے اسپیکر قومی اسمبلی نے کہا کہ عمران خان آرمی چیف کو ملنے گئے جو کہ اچھی بات ہے کیونکہ پاکستانی شہری ہونے کی حیثیت سے ایک دوسرے سے ملنا چاہیے، ہمیں نکتہ چینی کے بجائے ایک دوسرے پر اعتماد کرنا چاہیے۔


سردار ایاز صادق نے کہا کہ ہمیں عدلیہ اور اس کے فیصلوں کا احترام کرنا چاہیے، وزیراعظم کہہ چکے ہیں وہ عدلیہ کا احترام کرتے ہیں اور پاناما کیس میں عدالتی فیصلے مانیں گے تاہم اپیل کا اختیار سب کے پاس ہے ہمیں وہ حق اختیار کرنا چاہیے.

سی پیک سے متعلق اسپیکر کا کہنا تھا کہ اقتصادی راہداری پاکستان کےلیے بہت مفید ہے، اربوں ڈالر کی سرمایہ کاری پاکستان میں آرہی ہے، ہم اسپیشل اور صنعتی زونز میں صنعتیں لگانے والوں کو بھر پور مراعات دیں گے۔