فلم ’’ ریس ٹو ‘‘ میں چونکا دینے والا کردار نبھا رہی ہوں جیکولین

فنکارکو مسلسل سیکھنے کے مواقع ملتے رہتے ہیں، جیکولین فرنانڈس فوٹو : فائل

---

JHANG: بالی وڈ اداکارہ جیکولین فرنینڈس نے کہا ہے کہ نئی فلم ''ریس ٹو''میں منفردکردار نبھارہی ہوں۔ زندگی کھلی کتاب کی طرح ہے، پرستاروں سے کبھی کچھ نہیں چھپایا ،نئی فلم میں جنگجو حسینہ کا کردار ملنے پر خوش ہوں۔ اس فلم میں ہر چیز نئی ہوگی ،میری پرفارمنس بھی چونکا دینے والی ہے ۔

27سالہ اداکارہ کا کہنا ہے کہ فلم'' ریس''کے سیکوئل میں اہم کردار ملا ہے اور اس پر بڑی محنت بھی کی ہے۔ اداکاری کے شعبے میں فنکارکو مسلسل سیکھنے کے مواقع ملتے رہتے ہیں اور میری یہ کوشش ہوتی ہے کہ اپنے سینئرز سے سیکھ لوں ۔انھوں نے کہا کہ فلم کی کہانی بڑی دلچسپ ہے۔ اس پر پوری ٹیم نے محنت کی ہے۔ یہی سبب ہے کہ اس فلم کا لوگ شدت سے انتظار کر رہے ہیں ۔

فلمساز رامیش ایس تورانی کی اس فلم کے ہدایتکار عباس ، مستان ہیں، اس ہدایتکار جوڑی نے بڑی خوبی سے اس کہانی کو فلمایاہے ۔ اس میں انیل کپور ، سیف علی خان ، ڈیپکا پڈوکون، جان ابراہم اورامیشا پاٹیل اہم کردار نبھارہے ہیں ۔یہ کہانی شیراز احمد نے لکھی ہے اور میوزک پریتم نے تیار کیا ہے۔ انھوں نے کہا کہ شائقین کو اس فلم کی کہانی پسند آئے گی ۔ واضح رہے کہ اداکارہ سیف علی خان کے ساتھ ایک نئے روپ میں جلوہ گرہونے کے لیے تیار ہیں،یہ فلم ہندی ،اردو اور انگریزی زبان میں ریلیز کی جارہی ہے ۔ فلم رواں سال 25جنوری کو سینمائوں کی زینت بنائی جارہی ہے۔

اداکارہ جیکولین فرننڈس نے بتایا کہ پرانے زمانے کے ہتھیاروں سے لڑائی کرنے کی مہارت حاصل کرنے کے لیے دو ویت نامی ماہرین کی خدمات حاصل کی گئیں۔ فلم ''ریس ٹو''میں اپنے کردار سے مطمئن ہوں اور امیدہے میرا یہ نیا انداز پرستاروں کو بھی ضرور پسند آئے گا ۔ اداکارہ کے مطابق نئی فلموں کی آفرز ہیں اور ا ن میں کام کرنے کے لیے کچھ مہلت بھی مانگ رکھی ہے جونہی کچھ فراغت ملے گی تو نئی فلم کی شوٹنگ کا بھی آغاز کیا جائے گا ۔ادھر فلم کے ہدایتکار عباس،مستان نے کہا کہ نئی فلم ''ریس ٹو ''میں اداکارہ جیکولین فرننڈس نے اپنا کردار خوبی سے نبھایا ہے ۔



ان کی پرفارمنس سے بہت خوش ہیں اور انھوں نے اپنے کام کو بہتر بنایا ہے۔ ہدایتکار جوڑی کا کہنا ہے کہ اس فلم کی ڈیمانڈ کے مطابق جیکولین کی پرفارمنس زبردست رہی ہے۔ واضح رہے کہ 2جون 1985کو پیدا ہونے والی سری لنکا کی اداکارہ تین سال کی عمر میں والدین کے ساتھ بحرین چلی گئیں اور پھر کالج کی تعلیم کے لیے آسٹریلیا کا رخ کیا ۔جیکو لین نے تعلیم مکمل کرنے کے بعد سری لنکا واپسی کا فیصلہ کیا جہاں جاکر ماڈلنگ سے عملی زندگی کا آغاز کردیا۔جیکو لین نے سری لنکا ہی میں ٹی وی ڈرامہ میں بھی کردار نبھائے ۔2006کے دوران مس سری لنکا کا تاج پہننے کا اعزاز پایا۔

اسی سال اداکارہ لاس اینجلس کے مقابلہ حسن میں حصہ لینے گئیں تو انھیں بالی وڈ میں کام کرنے کی آفرز ہونے لگیں ۔جیکو لین نے 2009میں بالی وڈ فلم ''الہ دین ''میں امیتابھ اور رتیش دیش مکھ کے ساتھ کام کرکے دھوم مچادی۔2010میں اسی فلم میں پرفارم کرنے پر انٹر نیشنل اندین فلم اکیڈمی ایوارڈ جیتا ۔کئی کمرشلز بھی بنائی گئیں جن میں جیکو لین نے مرکزی کردار نبھایا ان میں شاہد کپور کے ساتھ ایک کمرشل بہت مقبول ہوئی ۔ ماڈلنگ کا سلسلہ بھارت میں بھی جاری رکھا گیا۔ فلم ''الہ دین'' میں اداکارہ نے رتیش دیشمکھ کے مدمقابل کردار نبھایا۔

اس کے بعد اداکارہ نے 2010میں فلم ''جانے کہاں سے آئے ہیں''میں تارا کا کردار بڑی خوبی سے نبھایا جسے فلمی ناقدین نے سراہا۔اسی سال فلم ''ہائوس فل ''میں اداکارہ نے مختصر پرفارم کیا ۔اس فلم میں جیکو لین کی ایک آئٹم سانگ کے لیے پرفارمنس نے فلم کے اس حصے کو یادگار بنا دیا۔ 2011میں اداکارہ جیکولین فرننڈس نے مہیش بھٹ کی تھرلر فلم ''مرڈرٹو'' میں خوبصورت کردار نبھایا ان کی عمدہ پرفارمنس کے سبب یہ فلم باکس آفس پر کامیاب ہوئی۔

اس کے بعد 5اپریل 2012کو ریلیز ہونے والی ہندی فلم ''ہائوس فل ٹو'' میں اہم کردار ادا کیا۔ اس فلم میں اکشے اور آسن کے ساتھ جیکو لین نے مرکزی کردار نبھایا۔ یہ فلم بھی باکس آفس پر راج کرتی رہی اور جیکولین کے کیرئیر کو چار چاند لگادیے۔ اب اداکارہ جیکو لین کی نئی فلم ''ریس ٹو ''ریلیز کے لیے تیار ہے ۔بالی وڈ حلقوں کا کہنا ہے کہ اداکارہ جیکو لین فرننڈس کی اداکاری میں بہتری آئی ہے اور ان کی نئی فلم سے بجا طور پر بڑی توقعات وابستہ کی جاسکتی ہیں ۔