کراچی کے علاقے گلشن غازی میں گھر پر پہاڑی تودہ گرنے سے 5 افراد جاں بحق

اگر پہاڑی تودہ فوری طور پر نہ ہٹایا گیا تو مزید 10 سے 12 مکانات اس کی زد میں آ کر متاثر ہو سکتے ہیں، علاقہ مکین۔ فوٹو : آئی این پی

---

گلشن غازی کے علاقے میں پہاڑی تودہ گرنے سے ایک ہی خاندان کے 5 افراد جاں بحق اور 3 زخمی ہو گئے۔

ایکسپریس نیوز کے مطابق کراچی کے علاقے گلشن غازی میں ایک مکان پر پہاڑی تودہ گرنے سے ایک ہی خاندان کے 5 افراد جاں بحق اور 3 زخمی ہو گئے۔ پہاڑی تودہ رات دیر گئے ضمیر نامی شخص کے گھر پر گرا جس کے نتیجے میں مکان مالک ضمیر، ان کی بیٹی اقرا اور بیٹا عبداللہ موقع پر ہی جاں بحق اور 5 افراد زخمی ہو گئے، بعد ازاں ایک خاتون اور ایک بچہ زخموں کی تاب نہ لاتے ہوئے دم توڑ گئے۔

اس خبر کو بھی پڑھیں: کراچی میں تودہ گرنے کا سانحہ

پہاڑی علاقہ ہونے کی وجہ سے مقامی افراد نے اپنی مدد آپ کے تحت لاشوں اور زخمیوں کو ملبے سے نکالا اور تمام متاثرین کو سول اسپتال منتقل کیا۔ زخمیوں کی شناخت 7 سالہ یسرا، 10 سالہ مسکان اور 13 سالہ رومہ شامل ہیں جنہیں طبی امداد دی جا رہی ہے۔

اس خبر کو بھی پڑھیں: بونیر میں پہاڑی تودہ گرنے سے ماں اور 2 بچے جاں بحق، 2 زخمی

علاقہ مکینوں کا کہنا ہے کہ اس گھر میں مدرسہ قائم تھا اور اگر صبح یا دوپہر کے اوقات میں اس قسم کا واقعہ رونما ہو جاتا تو زیادہ اموات ہو سکتی تھیں۔ مقامی افراد نے حکام سے مطالبہ کیا ہے کہ تودے کو ہٹانے کے لئے ہیوی مشینری بھیجی جائے تاہم پیچیدہ اور تنگ راستہ ہونے کے باعث ہیوی مشینری کا وہاں پہنچنا نا ممکن دکھائی دیتا ہے۔ علاقہ مکینوں کا کہنا ہے کہ اگر پہاڑی تودہ مزید سرکا تو 10 سے 12 دیگر مکانات بھی اس ک زد میں آ سکتے ہیں لہذا فوری طور پر تودے کو ہٹانے کا کام شروع کیا جائے۔