انو ملک کے بیٹے کپل شرما کے سلوک سے ناراض شو ادھورا چھوڑ گئے

کپل شرما کی حرکتوں کے باعث ان کے شو میں شریک میوزک ڈائریکٹر عمال ملک بھی شوٹنگ درمیان میں چھوڑ کر سیٹ سے چلے گئے۔ (فوٹو: فائل)

---

ابھی کپل شرما اور سنیل گروور میں تنازعہ ختم بھی نہیں ہوا کہ خبر ملی ہے کہ کپل شرما کی حرکتوں کے باعث ان کے شو میں آنے والے گلوکار اور میوزک ڈائریکٹر عمال ملک بھی شوٹنگ درمیان میں چھوڑ کر سیٹ سے چلے گئے۔

بھارتی میڈیا کے مطابق حال ہی میں سوناکشی سنہا اپنی نئی فلم ''نور'' کے پروموشن کےلیے ''دی کپل شرما شو'' کے سیٹ پر پہنچی تھیں جبکہ فلم کے میوزک ڈائریکٹرز ارمان ملک اور عمال ملک بھی ان کے ساتھ تھے لیکن جیسے ہی شوٹنگ شروع ہوئی تو ارمان سے کہا گیا کہ وہ حاضرین کے ساتھ جا کر بیٹھ جائیں۔ یہ بات ان کے بڑے بھائی عمال ملک کو بہت بری لگی اور وہ شوٹنگ چھوڑ کر چلے گئے اور سوناکشی بھی یہ سب دیکھ کر پریشان ہوگئیں۔ بتاتے چلیں کہ عمال ملک اور ارمان ملک کا تعلق موسیقار گھرانے سے ہے اور وہ بالی ووڈ کے مشہور میوزک ڈائریکٹر انو ملک کے بیٹے ہیں۔

اس خبر کو بھی پڑھیں: پرینیتی چوپڑا نے کپل شرما کو کھری کھری سنا دیں

واضح رہے کہ کپل شرما اپنی بدتمیزیوں اور سیٹ پر دیر سے پہنچنے کی وجہ سے بدنام ہیں کیونکہ اس سے پہلے بھی وہ اپنے شو میں ''اوکے جانو'' کی پروموشن کےلیے آنے والی شردھا کپور اور ادتیا رائے کپور کو 5 گھنٹے انتظار کرواکر ناراض کرچکے ہیں جبکہ چند روز قبل اسی طرح انہوں نے 'کپل شرما شو' کے سیٹ پر ودیا بالن کو 6 گھنٹے انتظار کروایا تھا جو اپنی فلم 'بیگم جان' کی پروموشن کےلیے آئی ہوئی تھیں۔

اس خبر کو بھی پڑھیں:سنیل سے جھگڑے کے بعد کپل شرما کا شو مشکلات کا شکار

دورانِ پرواز کپل شرما کی بدتمیزی اور گالم گلوچ کے بعد سنیل گروور اس شو سے الگ ہوچکے ہیں اور اب وہ کسی بھی قیمت پر دوبارہ 'کپل شرما شو' میں کام کرنے کےلیے تیار نہیں۔ البتہ سونی اینٹرٹینمنٹ ٹیلی ویژن (سیٹ انڈیا) کی انتظامیہ نے سنیل کی مقبولیت دیکھتے ہوئے انہیں اسی چینل پر ایک علیحدہ شو کی پیشکش کردی ہے جو متوقع طور پر جون میں شروع کردیا جائے گا۔

اس خبر کو بھی پڑھیں: بھارتی ٹی وی کی سنیل کو کپل شرما کی جگہ اپنا شو لانے کی پیشکش

اگرچہ ابھی اس شو کے نام کا حتمی فیصلہ نہیں ہوا ہے لیکن اتنا ضرور معلوم ہوا ہے کہ اس میں سنیل گروور کے ساتھ کپل شرما کی ٹیم کے بڑے نام موجود ہوں گے جن میں چندن پربھاکر، علی اصغر اور سگدھا مشرا کے علاوہ 'کپل شرما شو' کی سابقہ کری ایٹیو ڈائریکٹر پریتی سموس بھی شامل ہیں۔