نئے ٹیلنٹ کو آزمانے کے دعوے غلط ثابت ہوگئے

آصف ذاکر، فہیم اشرف، اصغر اور فخرزمان کو ون ڈے ڈیبیوکا موقع ہی نہیں دیا گیا

Sports Reporter/Abbas Raza April 12, 2017

ٹی20سیریز میں عثمان شنواری اورنواز کا دورہ بھی صرف سیر کرنے تک محدود رہا۔ فوٹو: فائل

ویسٹ انڈیز کیخلاف سیریز میں نئے ٹیلنٹ کو آزمانے کے دعوے غلط ثابت ہوئے، آصف ذاکر، فہیم اشرف، محمد اصغر اور فخر زمان کو ون ڈے ڈیبیو کا موقع ہی نہ دیا گیا۔

دورئہ ویسٹ انڈیز میں محدود اوورز کی کرکٹ کیلیے اسکواڈز کا انتخاب کرتے ہوئے چیف سلیکٹر انضمام الحق نے کہا تھا کہ نوجوان کرکٹرز کو مواقع دینے کیلیے سہیل خان سمیت چند کرکٹرز کو ڈراپ کیا گیا ہے۔ دوسری جانب منتخب کیے جانے والے نئے ٹیلنٹ میں سے صرف شاداب خان تسلسل کے ساتھ کھیلتے نظر آئے، کئی نام نہاد سینئرز ناقص کارکردگی کے باوجود ٹیم سے جڑے رہے جبکہ ون ڈے کرکٹ میں ڈیبیو کے منتظر آصف ذاکراور فہیم اشرف کوایک میچ میں بھی آزمانے کی ضرورت محسوس نہیں کی گئی۔

علاوہ ازیں دورہ آسٹریلیا کے ٹیسٹ اسکواڈ میں شامل محمد اصغر کو وہاں انٹرنیشنل کیریئر شروع کرنے کا موقع نہیں ملا تواس بار بھی کہانی مختلف نہیں رہی، ''باصلاحیت'' اسپنر نے تمام ون ڈے میچز باہر بیٹھ کر دیکھے، ویسٹ انڈیز کیخلاف ٹوئنٹی 20 کرکٹ ڈیبیو کرنے والے فخر زمان کو بھی کسی ون ڈے میچ میں توجہ کے قابل نہیں سمجھا گیا، مختصر فارمیٹ کی سیریز کیلیے اسکواڈ میں شامل عثمان شنواری اور محمد نواز کا دورہ بھی سیر سپاٹے تک محدود رہا، رومان رئیس کو 4میں سے صرف ایک میچ میں آزمایا گیا۔

ٹیسٹ اسکواڈ میں شاداب خان کے ساتھ عثمان صلاح الدین اور محمد عباس جیسے کرکٹرز بھی شامل ہیں، محمد اصغر ایک بار پھر ڈیبیو کے منتظر ہوں گے جبکہ شان مسعود کم بیک کا موقع پانے کیلیے بے تاب ہیں،ان میں سے کس کی قسمت کا دروازہ کھلے گا تاہم یہ فیصلہ ٹیم مینجمنٹ کرے گی۔