اللہ کے راستے میں خرچ کرنے کی ترغیب

یہ خیال کہ اولاد کی خیر خواہی کی وجہ سے مال کو جمع کرکے چھوڑنا ہے، نفس کا محض دھوکا ہے

مفتی محمد وقاص رفیع April 14, 2017

یہ خیال کہ اولاد کی خیر خواہی کی وجہ سے مال کو جمع کرکے چھوڑنا ہے، نفس کا محض دھوکا ہے: فوٹو : فائل

JHELUM: ہم سب تجارت، زراعت، کاروبار اور مختلف ذرایع سے روپیہ پیسا کمانے میں جتنی محنت اور کوشش کرکے اس کو جمع کرتے ہیں وہ سب اسی لیے ہوتا ہے کہ آنے والے وقت کے لیے کچھ ذخیرہ اپنے پاس محفوظ رہے تاکہ ضرورت کے وقت کام میں لایا جاسکے کہ نہ معلوم کس وقت کیا ضرورت پیش آجائے لیکن جو اصل ضرورت کا وقت ہے اور اُس کا پیش آنا بھی ضروری ہے اور یہ بھی یقینی ہے کہ اُس وقت صرف وہی کام آئے گا جو اپنی زندگی میں خدائی بینک میں جمع کرا دیا گیا ہو کہ وہ تو جمع شدہ ذخیرہ بھی پورا پورا ملے گا اور اُس میں اﷲ جل شانہ کی طرف سے اضافہ بھی ہوتا رہے گا۔

اُس طرف ہم لوگ بہت ہی کم التفات کرتے ہیں۔ حالاں کہ دُنیا کی یہ زندگی چاہے کتنی ہی زیادہ ہوجائے بہ ہرحال ایک نہ ایک دن ختم ہوجانے والی ہے اور آخرت کی زندگی کبھی بھی ختم ہونے والی نہیں ہے۔ دُنیا کی زندگی میں اگر اپنے پاس سرمایہ نہ رہے تو اِس وقت محنت مزدوری بھی کی جاسکتی ہے، کسی سے قرض اور مدد بھی طلب کی جاسکتی ہے لیکن آخرت کی زندگی میں کوئی صورت کمائی کی نہیں ہے، وہاں صرف وہی کام آئے گا جو ذخیرے کے طور پر آگے بھیج دیا گیا۔

حضور اقدسؐ کا پاک ارشاد ہے کہ : '' قیامت کے دن آدمی ایسا (ذلیل و ضعیف) لایا جائے گا جیسے کہ بھیڑ کا بچہ ہوتا ہے اور اﷲ جل شانہ کے سامنے کھڑا کیا جائے گا۔ ارشاد ہوگا کہ : '' میں نے تجھے مال عطا کیا، حشم و خدم دیے، تجھ پر اپنی نعمتیں برسائیں تونے اِن سب انعامات میں کیا کار گزاری دکھائی۔'' وہ عرض کرے گا کہ : ''میں نے خوب مال جمع کیا اُس کو ( اپنی کوشش سے ) بہت بڑھایا اور جتنا شروع میں میرے پاس تھا اُس سے بہت زیادہ کرکے چھوڑ آیا، آپ مجھے دُنیا میں واپس بھیج دیں، مَیں وہ سب آپ کی خدمت میں حاضر کردوں۔''

ارشاد ہوگا : '' مجھے تو وہ بتا جو تو نے زندگی میں ( ذخیرے کے طور پر آخرت کے لیے ) آگے بھیجا۔'' وہ پھر اپنا پہلا کلام دہرائے گا کہ : '' میرے پروردگار! میں نے خوب مال جمع کیا اُس کو ( اپنی کوشش سے ) بہت بڑھایا اور جتنا شروع میں میرے پاس تھا اُس سے بہت زیادہ کرکے چھوڑ آیا، آپ مجھے دُنیا میں واپس بھیج دیں، مَیں وہ سب لے کر حاضر ہوں۔'' ( یعنی خوب صدقہ کروں تاکہ وہ سب یہاں میرے پاس آجائے ) چوں کہ اُس کے پاس کوئی ذخیرہ ایسا نہیں نکلے گا جو اُس نے اپنے لیے آگے بھیج دیا ہو ، اس لیے اُس کو جہنم میں پھینک دیا جائے گا۔'' (ترمذی و مشکوٰۃ)

ایک اور حدیث میں حضور اقدس ؐ کا ارشاد وارد ہے : '' مَیں جنت میں داخل ہوا تو میں نے اُس کی دونوں جانب تین سطریں سونے کے پانی سے لکھی ہوئی دیکھیں، پہلی سطر میں '' '' لاالٰہ الا اﷲ محمد رسول اﷲ '' لکھا تھا، دوسری سطر میں '' جو ہم نے آگے بھیج دیا وہ پالیا اور جو دُنیا میں کھایا وہ نفع میں رہا اور جو کچھ چھوڑ آئے وہ نقصان میں رہا '' اور تیسری سطر میں لکھا تھا : ''امت گناہ گار اور رب بخشنے والا ہے۔'' ( برکاتِ ذکر)

ایک اور حدیث میں آتا ہے : '' جب آدمی مرجاتا ہے تو فرشتے پوچھتے ہیں کہ : '' کیا ذخیرہ اپنے حساب میں جمع کرایا ؟ کیا چیز کل کے لیے بھیجی ؟ اور آدمی سے یہ پوچھتے ہیں کہ : '' کیا مال چھوڑا ؟۔'' ( مشکوٰۃ)

ایک اور حدیث میں ہے، حضورؐ نے دریافت فرمایا : '' تم میں کون شخص ایسا ہے جس کو اپنے وارث کا مال اپنے سے زیادہ محبوب ہو ؟ '' صحابہؓ نے عرض کیا : '' یارسول اﷲ ﷺ! ہم میں کوئی بھی ایسا نہیں ہے جس کو اپنا مال اپنے وارث سے زیادہ محبوب نہ ہو۔'' حضور ؐ نے فرمایا : '' آدمی کا اپنا مال وہ ہے جو اُس نے آگے بھیج دیا اور جو چھوڑ گیا وہ اُس کا مال نہیں بل کہ یہ اُس کے وارث کا مال ہے۔'' (مشکوٰۃ عن البخاری )

ایک دوسری حدیث میں حضورِ اقدس ؐ کا ارشاد وارد ہوا ہے : '' آدمی کہتا ہے : '' میرا مال ، میرا مال۔'' اُس کے مال میں سے اُس کے لیے صرف تین چیزیں ہیں، جو کھا کر ختم کردیا یا پہن کر پرانا کردیا، یا اﷲ کے یہاں اپنے حساب میں جمع کرا دیا۔ اس کے علاوہ جو کچھ ہے وہ اُس کا مال نہیں ( بل کہ وہ سب کچھ دوسرے) لوگوں کے لیے چھوڑ جائے گا۔'' (مشکوٰۃ)

ہمارے مشاہدے میں یہ ایک عجیب بات اکثر و بیشتر آتی رہتی ہے کہ آدمی اکثر ایسے لوگوں کے لیے جمع کرتا ہے، مشقت اُٹھاتا ہے، مصیبتیں جھیلتا ہے، تنگی برداشت کرتا ہے، جن کو وہ اپنی خواہش سے ایک پیسا دینے کا بھی روادار نہیں ہوتا، لیکن جمع کرکے آخر کار اُنہی کے لیے چھوڑ جاتا ہے اور مقدرات اُنہی کو سارے مال کا وارث بنا دیتے ہیں جن کو وہ ذرا سا بھی دینا نہیں چاہتا تھا۔

حضرت ارباط بن سہیہ ؒ کا جب انتقال ہونے لگا تو انہوں نے چند اشعار پڑھے، جن کا مطلب یہ تھا کہ : '' آدمی کہتا ہے کہ میں نے مال بہت جمع کیا، لیکن اکثر کمانے والا دوسروں (یعنی وارثوں ) کے لیے جمع کرتا ہے وہ خود تو اپنی زندگی میں اپنا بھی حساب لیتا رہتا ہے کہ کتنا مال کہاں خرچ ہوا ؟ کتنا کہاں خرچ ہوا ؟ لیکن بعد میں ایسے لوگوں کی لُوٹ کے لیے چھوڑ جاتا ہے، جن سے حساب بھی نہیں لے سکتا کہ سارے کا سارا کہاں اُڑا دیا ؟ پس آدمی کو چاہیے کہ وہ اپنی زندگی میں کھالے اور دوسروں کو کھلادے اور اپنے بخیل وارث سے چھین لے۔ آدمی خود تو مرنے کے بعد نامراد رہتا ہے (یعنی کوئی اِس کو اُس مال میں یاد نہیں رکھتا ) لیکن دوسرے لوگ اُس کے مال کو کھاتے اُڑاتے پھرتے ہیں۔ آدمی خود تو اُس مال سے محروم ہوجاتا ہے اور دوسرے لوگ اِس سے اپنی خواہشات پوری کرلیتے ہیں۔''

( بہ حوالہ: اتحاف سادۃ المتقین )

ایک بزرگ فرماتے ہیں : '' مَیں سب سے پہلے اپنے نفس کو نصیحت کرتا ہوں، اس کے بعد اپنے دوستوں کو : '' کہ ساتھ جانے والا مال صرف وہی ہے جس کو اﷲ کے بینک میں جمع کرادیا، اور جس مال کو جمع کرکے اور خوب بڑھاکر چھوڑ دیا وہ اپنے کام نہیں آتا، بعد میں نہ کوئی ماں باپ یاد رکھتا ہے اور نہ ہی بیوی بچے پوچھتے ہیں۔ الاماشاء اﷲ۔ بل کہ اپنا ہی کیا کام آتا ہے۔ ان سب کی محبتوں کا خلاصہ دو چار دن '' ہائے ہائے '' کرنے اور پانچ سات مفت کے آنسو بہانے کے علاوہ اور کوئی نہیں ہے۔ بل کہ اگر اِن آنسوؤں میں بھی پیسے خرچ کرنا پڑیں تو یہ آنسو بھی نہ رہیں۔

یہ خیال کہ اولاد کی خیر خواہی کی وجہ سے مال کو جمع کرکے چھوڑنا ہے، نفس کا محض دھوکا ہے، صرف مال جمع کرکے اُن کے لیے چھوڑ جانا اُن کے ساتھ خیر خواہی نہیں ہے بل کہ شاید بدخواہی بن جائے۔ اگر واقعی اولاد کی خیر خواہی مقصود ہے، اگر واقعی یہ دل چاہتا ہے کہ وہ اس کے مرنے کے بعد پریشان حال، ذلیل و خوار نہ پھریں تو اُن کو مال دار چھوڑنے سے زیادہ ضروری اُن کو دین دار چھوڑنا ہے کہ بے دینی کے ساتھ مال بھی اوّلاً اُن کے پاس باقی نہ رہے گا بل کہ چند یوم کی شہوات و لذات میں اُڑ جائے گا اور اگر رہا بھی تو اپنے کسی کام کا نہیں ہے اور دین داری کے ساتھ اگر مال نہ بھی ہو تو اُن کی دین داری اُن کے لیے بھی کام آنے والی چیز ہے اور اپنے لیے بھی کام آنے والی چیز ہے اور مال میں سے تو اپنے کام آنے والا صرف وہی ہے جو ساتھ لے گیا اور بس! ( فضائل صدقات)