صدرآصف زرادری نے کہا ہے کہ عام انتخابات مقررہ وقت پر ہی ہوں گے اور انتخابات کا التوا چاہنے والوں کو مایوسی کا سامنا کرنا پڑا۔

ایوان صدرکےترجمان فرحت اللہ بابر کےمطابق صدر آصف زرداری نے لانگ مارچ کے دوران ہوئے کامیاب مذاکرات پر حکومت اور اپوزیشن جماعتوں کو مبارکباد پیش کی۔ صدرنے کہا کہ کسی تشدد کے بغیر کامیاب مذاکرات جمہوریت اور مفاہمتی پالیسی کی فتح ہے۔

صدر آصف زرداری نے واضح کیا کہ انتخابات میں ایک دن کی بھی تاخیر نہیں کی جائے گی۔ انہوں نے لانگ مارچ کے شرکا کی حفاظت اور انتظامات پر وزارت داخلہ اور سیکیورٹی اداروں کے کردار کی بھی تعریف کی۔