افغانستان کے علاقے اسپن بولدک کے اسلحہ ڈپو میں دھماکا ہلاکتوں کا خدشہ

اسپن بولدک اسلحہ ڈپو دھماکے میں افغان فوجیوں کی بڑی تعداد میں ہلاکتوں کا خدشہ ہے۔ (فوٹو: فائل)

---

افغانستان کے سرحدی علاقے اسپن بولدک کے اسلحہ ڈپو میں رات گئے مسلسل شدید دھماکوں میں ہلاکتوں کا خدشہ ظاہر کیا جارہا ہے۔

افغان ذرائع کے مطابق چمن کے قریب افغانستان کے سرحدی علاقے اسپن بولدک میں رات گئے اسلحہ ڈپو میں پے در پے کئی دھماکے ہوئے جو اتنے شدید تھے کہ ان کی آوازوں سے پاکستانی شہر چمن شہر بھی لرز اٹھا جب کہ کئی گھروں کی دیواروں میں دراڑیں بھی پڑگئیں۔

ذرائع کے مطابق چار زخمیوں کو اسپن بولدک کے اسپتال منتقل کردیا گیا ہے جبکہ حکام کی جانب سے اب تک افغان فوجیوں کی ہلاکت کے بارے میں کچھ نہیں بتایا گیا ہے لیکن خدشہ ان دھماکوں میں افغان فوجی بھی بڑی تعداد میں ہلاک ہوئے ہوں گے۔

واقعے کی تفتیش کےلیے قندھار میں کمیشن تشکیل دے دیا گیا ہے جبکہ پاکستان کی جانب سے پاک افغان سرحد پر سیکیوریٹی مزید سخت کردی گئی ہے۔