زیادتیوں کا شکار لیکن سروں کا تاج ’یونس خان‘

لوگ اب بھی کہتےہیں کہ یونس خان کی تکنیک ٹھیک نہیں، لیکن ایسےتمام لوگوں کو یونس خان نے اپنی کارکردگی سے بھرپور جواب دیا

فہیم پٹیل April 24, 2017

یونس خان کے پاس جو سب سے بڑا اور عظیم ریکارڈ ہے وہ یہ کہ اپنے17 سالہ کیرئیر میں اُن پر ایک مرتبہ بھی کرپشن کا الزام نہیں لگا۔ فوٹو: اے ایف پی

'ایک دن ضرور آئے گا، جب میں اپنے طے کردہ اہداف کو حاصل کروں گا، اور جب تک میں وہ اہداف حاصل نہ کرلوں، سکون سے نہیں بیٹھوں گا بلکہ مستقل بنیادوں پر اپنی کوششیں جاری رکھوں گا۔'

یہ بیان مردِ بحران یونس خان نے لگ بھگ ڈیڑھ سال قبل اُس وقت دیا تھا جب انہوں نے ٹیسٹ کرکٹ میں پاکستان کی جانب سے سب سے زیادہ رنز بنانے کا ریکارڈ توڑ کر جاوید میانداد کو پیچھے چھوڑا تھا۔ یونس خان نے اُس وقت بیان دیا تھا کہ ابھی وہ اپنی حاصل کردہ کامیابیوں سے مطمئن نہیں ہیں بلکہ وہ چاہتے ہیں کہ جلد ٹیسٹ کرکٹ میں 10 ہزار رنز بنانے والے پہلے پاکستانی بلے باز بن جائیں۔ اِس خواہش کے اظہار کے بعد انہوں نے صرف ڈیڑھ سال کی مدت میں 14 میچوں میں 47 کی اوسط کے ساتھ یہ اعزاز حاصل کرلیا۔

یونس خان نے یہ اعزاز حاصل کرنے کے لیے 208 اننگز کا سہارا لیا، اِس سے پہلے صرف ویسٹ انڈیز سے تعلق رکھنے والا مایاناز بلے باز برائن لارا تھے جنہوں نے سب سے کم 195 اننگز میں یہ اعزاز اپنے نام کیا۔

مزید بات کرنے سے پہلے آپ کو بتاتے ہیں کہ کن کن کھلاڑیوں نے سب سے پہلے اپنے ملک کے لیے یہ کارنامہ سرانجام دیا ہے۔

کھلاڑی کا نام	کس ملک سے تعلق؟	کس ملک کے خلاف ریکارڈ بنایا؟	کتنی اننگز میں بنایا؟	کب بنایا؟
برائن لارا	ویسٹ انڈیز	انگلستان	195	اگست 2004
یونس خان	پاکستان	ویسٹ انڈیز	208	اپریل 2017
مہیلا جے وردھنے	سری لنکا	جنوبی افریقہ	210	دسمبر 2011
سنیل گاوسکر	بھارت	پاکستان	212	مارچ 1987
جاک کیلس	جنوبی افریقہ	آسٹریلیا	217	فروری 2009
الیسٹر کک	انگلستان	سری لنکا	229	مئی 2016
ایلین بارڈر	آسٹریلیا	ویسٹ انڈیز	235	جنوری 1993

یوں تو یونس خان نے پاکستان کے لیے بہت سارے ریکارڈز اپنے نام کیے۔ جیسے ٹیسٹ کرکٹ میں سب سے زیادہ رنز بنانے کے علاوہ سب سے زیادہ 34 سنچریاں، سب سے زیادہ 5 ڈبل سنچریاں، ٹیسٹ میچ کھیلنے والی ہر ٹیم کے خلاف سنچری بنانے کا ریکارڈ، صرف یہی نہیں بلکہ پاکستان کی جانب سے ٹیسٹ کرکٹ میں سب سے زیادہ 53.06 کی اوسط کے ساتھ رنز بنانے کا ریکارڈ بھی یونس خان کے پاس ہی ہے لیکن اِس طرح کے تمام ریکارڈ سے بڑھ کر یونس خان کے پاس ایک اور عظیم ریکارڈ ہے، اور وہ ریکارڈ یہ کہ اپنے 17 سالہ کیرئیر میں اُن پر ایک مرتبہ بھی، جی ہاں، ایک مرتبہ بھی کرپشن کا الزام نہیں لگا، کبھی ایک بار بھی کسی دشمن نے بھی یہ الزام نہیں لگایا کہ یونس خان نے کبھی بھی کسی ایسی کارروائی میں حصہ لیا ہو جس سے پاکستان کا نام بدنام ہوا ہے۔

لیکن اِس عظیم ترین ریکارڈ کے باوجود افسوس کی بات یہ کہ آج تک انہیں کبھی وہ رتبہ نہیں مل سکا جو کسی بھی ایسے عظیم کھلاڑی کو ملنا چاہیے۔ یونس خان کے کیرئی میں کئی مواقع ایسے آئے جب شائقینِ کرکٹ اور خود یونس خان کو ایسا لگا کہ بس اب اُن کا کیرئیر ختم ہوچکا، اُن کے راستے میں کرکٹ بورڈ کی جانب سے بار بار رکاوٹیں ڈالی جاتی رہیں، پھر سونے پر سہاگہ یہ ہوا کہ میڈیا نے بھی کبھی انہیں وہ عزت نہیں بخشی جس کے یونس خان حقدار تھے۔

ایک وقت آیا جب یونس خان کو سینٹرل کانٹریکٹ میں 'کیٹگری اے' سے 'کیٹگری بی' میں منتقل کردیا اور وجہ یہ بتائی گئی کہ وہ صرف ٹیسٹ میچ کھیلتے ہیں، حالانکہ اُنہی دنوں شاہد آفریدی ٹیسٹ میچ نہیں کھیلتے تھے مگر اِس کے باوجود وہ کیٹگری اے میں ہی رہے۔

یہ 2009ء کی بات ہے جب یونس خان نے ایک روزہ کرکٹ سے بطور کپتان استعفیٰ دے دیا تھا، کیونکہ سینیٹ کمیٹی نے میچ فِکسنگ کے حوالے سے تحقیقات کا آغاز کیا تھا جس میں وہ سرخرو ہوئے، مگر سرخرو ہونے کے باوجود انہوں نے بطور کپتان اپنی ذمہ داریاں واپس کردیں۔ 2010ء میں کرکٹ بورڈ نے یونس خان پر تاحیات پابندی عائد کردی اور وجہ یہ بتائی گئی کہ دورہِ آسٹریلیا میں وہ کھلاڑیوں کے درمیان آپس کی لڑائی کا حصہ تھے، لیکن صرف تین ماہ بعد ہی یہ پابندی اُٹھالی گئی۔ اِn سارے معاملات میں یونس خان کو رسوا کرنے کے سوا کچھ نہیں کیا گیا۔

لیکن ذاتی رائے یہی ہے کہ اِس پورے معاملے میں قصور یونس خان سے زیادہ ہمارا ہے۔ ہم ہمیشہ اُنہی لوگوں کی حمایت کرتے ہیں جو مختصر وقت کے لیے ہی سہی لیکن ہمیں کچھ نہ کچھ تفریح فراہم کرجائیں۔

یہ ہم ہی ہیں نا جنہوں نے کرکٹ کے شعبے میں یونس خان کے مقابلے میں شاہد آفریدی کو سر پر چڑھایا، حالانکہ شاہد آفریدی کا معیار یونس خان کے مقابلے میں عشر عشیر بھی نہیں۔

صرف آفریدی کی بات کیوں کی جائے؟ سیاست کے میدان میں آئیے تو ہمیں وہی سیاست دان پسند ہیں جو دوسروں کو کچھ اِس انداز میں گالیاں دے کہ ہمیں مزہ آئے، پھر چاہے وہ خود ہی ہمارے جسم سے کھال نکالنے کی ذمہ داری پر معمور کیوں نہ ہوں۔ لیکن اگر کوئی کرپشن سے پاک سیاستدان سنجیدگی اور اخلاص کے ساتھ، دوسروں کو گالی دیے بغیر عوام کی فلاح و بہبود کی بات کرے تو ہم ایسا صاف ستھرا کام کرنے والوں کو انتخابات میں مسترد کرکے پوری پوری سزا دیتے ہیں۔

لوگ اب بھی کہتے ہیں کہ یار یونس خان کا اسٹائل اور تکنیک ٹھیک نہیں ہے، لیکن ایسے تمام لوگوں کو یونس خان نے اپنی کارکردگی سے بھرپور جواب دیا کہ کوئی بھی تکنیک اور اسٹائل مضبوط ارادوں سے بڑھ کر نہیں ہوتا۔ اگر کوئی کھلاڑی نیک نیتی سے کچھ کرنا چاہے، کچھ حاصل کرنا چاہے تو مشکل ترین حالات کے باوجود وہ کام انجام تک پہنچایا جاسکتا ہے۔

ذاتی رائے یہ ہے کہ یونس خان کا کیرئیر دیگر تمام کھلاڑی کے برعکس کانٹوں کی سیج ثابت ہوا ہے، جس نے اپنے کیرئیر کے دوران میچ فکسنگ سے اسپاٹ فکسنگ تک تمام حالات دیکھے، جس نے دہشتگردی کا بھی سامنا کیا، جس نے اپنے ساتھیوں کو اپنے سامنے جیل جاتے بھی دیکھا، لیکن اِن تمام تر مشکل حالات کے باوجود اِس مردِ بحران نے نہ صرف خود کو مضبوط و منظم رکھا بلکہ نئے کھلاڑیوں کی بھی ہمت و حوصلہ افزائی کا بندوبست کیے رکھا۔

یہ ساری باتیں بتانے کا مقصد یہ صرف یہ ہے کہ یونس خان جیسے کھلاڑی صدیوں میں پیدا ہوتے ہیں، ہم نہیں جانتے کہ اب اگلا یونس خان ہمیں کب دیکھنے کو ملے؟ اِس لیے ماضی میں جو بھی اِس کھلاڑی کے ساتھ سلوک رکھا گیا ہے اُس غلطی کو دھونے کا وقت آچکا ہے۔ کرکٹ بورڈ کو ماضی میں ہونے والے واقعات پر کُھلے دل کے ساتھ یونس خان سے معذرت کرنی چاہیے، صرف یہی نہیں بلکہ اُن کو اِس قدر شاندار طریقے سے رخصت کرنا چاہیے کہ نئے کھیلنے والوں کو بھی ہمت ملے کہ اگر بغیر کرپشن کیے، ملک کا نام بدنام کیے بغیر مستقل مزاجی کے ساتھ کھیل کے ساتھ انصاف کیا جائے تو ایک دن اُن کو بھی اِسی طرح عزت سے نوازا جائے گا۔

اگر آج ہم یہ بھی نہ کرسکے تو پھر ہمیں یہ اُمید رکھنا بھی چھوڑ دینی چاہیے کہ مستقبل میں ہمیں یونس خان یا ایسا ہی کوئی دوسرا بلے باز میسر آسکے گا۔

[poll id="1366"]

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس