مسجدنبویؐ کے باہر دھماکے میں ملوث پاکستانیوں سمیت 46 افراد گرفتار

کارروائی پہلے سے گرفتار گروپ کی نشاندہی پر ہوئی، سعودی عرب، یمن، مصر، اردن اور سوڈان کے شہری بھی گرفتار شدگان میں شامل، فوٹو؛ فائل

---

سعودی سیکیورٹی فورسز نے گزشتہ برس مسجد نبوی کے قریب ہونے والے دھماکے میں مبینہ طور پر ملوث پاکستانی شہریوں سمیت 46 افراد کو گرفتار کرلیا۔

غیرملکی خبررساں ادارے کے مطابق سعودی سیکیورٹی فورسز نے گزشتہ برس مدینہ منورہ میں مسجد نبوی کے نزدیک خودکش حملے میں ملوث ہونے کے الزام میں 46 افراد کو گرفتارکرلیا جن میں پاکستانی شہری بھی شامل ہیں۔ سعودی وزار داخلہ کے ترجمان کے مطابق فورسز نے مشتبہ افراد کو جدہ شہر سے گرفتار کیا جن میں 32 سعودی شہریوں کے علاوہ 14 غیرملکی بھی ہیں جن کا تعلق پاکستان، یمن، مصر، اردن اور سوڈان سے ہے۔

اس خبرکوبھی پڑھیں: مسجد نبوی کے باہر دھماکا؛ خاندان کا خودکش بمبار سے اظہار لا تعلقی

وزارت داخلہ کے ترجمان کا کہنا تھا کہ 46 افراد کی گرفتاری مسجد نبوی کے باہر ہونے والے خودکش حملے میں ملوث پہلے سے گرفتار شدت پسندوں کے ایک گروپ کے دہشت گردوں کی نشاندہی پرعمل میں آئی جب کہ یہ گروپ جدہ میں امریکی قونصلیٹ کے نزدیک ہونے والے خودکش دھماکے میں بھی ملوث تھا۔

اس خبرکوبھی پڑھیں: مسجد نبویؐ میں قرآن مجید کا 6 نئی زبانوں میں ترجمہ شامل

واضح رہے کہ گزشتہ رمضان میں سعودی عرب میں دو دھماکے ہوئے تھے اور مسجد نبوی کے باہر ہونے والے دھماکے میں 4 سیکیورٹی اہلکار شہید ہوگئے تھے۔