افغان فورسز کی جانب سے ایف سی اہلکاروں کو نشانہ بنانا افسوسناک ہے ترجمان پاک فوج

افغان فورسز کی جانب سے فائرنگ کے پیش نظر چمن بارڈر کو بند کر دیا گیا ہے، ڈی جی آئی ایس پی آر۔ فوٹو: ایکسپریس نیوز

---

لاہور: پاک فوج کے ترجمان نے افغان فورسز کی جانب سے مردم شماری میں مصروف عمل ایف سی اہلکاروں کو نشانہ بنانے کے اقدام کو انتہائی افسوسناک قرار دیا ہے۔

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے سوشل میڈیا پر ٹویٹ کیا کہ افغان فورسز کی جانب سے مردم شماری میں مصروف ایف سی اہلکاروں پر فائرنگ کی گئی جس کے نتیجے میں ایک شہری شہید اور ایف سی کے 4 اہلکاروں سمیت 18 افراد زخمی ہوئے۔ افغان فورسز کی جانب سے چمن کے علاقوں کلی لقمان اور کلی جہانگیر میں مردم شماری میں رکاوٹیں کھڑی کی جا رہی ہیں۔

Afg Bdr Police opens fire on FC tps detailed for security of Census in a village along Chaman Bdr. 1 Civ Shaheed,18 incl 4 FC sldrs injured. pic.twitter.com/ce6hdqQzuu

— DG ISPR (@OfficialDGISPR) May 5, 2017

ترجمان پاک فوج کے مطابق افغان حکام کو مردم شماری سے متعلق آگاہ کیا جا چکا ہے لیکن تفصیلات فراہم کرنے کے باوجود افغان فورسز کی جانب سے کارروائی افسوسناک ہے۔ ڈی جی آئی ایس پی آر کے مطابق دونوں جانب سے فائرنگ کا تبادلہ تاحال جاری ہے جب کہ افغان فورسز کی جانب سے فائرنگ کے پیش نظر چمن بارڈر کو بند کر دیا گیا ہے۔