سیمنٹ 6 فیصد اضافے سے ریکارڈ 339 ملین ٹن فروخت

جولائی تااپریل مقامی فروخت11فیصد بڑھی، ایکسپورٹ میں 19 فیصد کی کمی.

Business Reporter May 06, 2017

اے پی سی ایم اے کے مطابق اپریل میں سیمنٹ کی فروخت 3.576 ملین ٹن اور پیداواری گنجائش کا استعمال 92 فیصد رہا۔ فوٹو: فائل

سیمنٹ کی مقامی فروخت ریکارڈ سطح پر پہنچ گئی تاہم ایکسپورٹ میں کمی کا سلسلہ نہ رک سکا جس کی وجہ سے ریکارڈ مقامی کھپت کے باوجود رواں سال کے ابتدائی 10میں سیمنٹ کی مقامی فروخت میں اضافہ 6 فیصد تک محدود ہوگیا۔

سیمنٹ انڈسٹری نے برآمدات میں اضافے کے لیے اقدامات، صنعت کے تحفظ کے لیے غیرمعیاری درآمدات کی روک تھام اور قومی معیار پر پورا نہ اترنے والی غیرملکی سیمنٹ کی پاکستانی مارکیٹ میں فروخت پر پابندی کا مطالبہ کردیا ہے۔

دوسری جانب آل پاکستان سیمنٹ مینوفیکچررز ایسوسی ایشن (اے پی سی ایم اے) کے مطابق رواں مالی سال کے ابتدائی 10 ماہ (جولائی تا اپریل 2017) میں سیمنٹ کی مقامی کھپت 10.74فیصد کے اضافے سے 29.871ملین ٹن، ایکسپورٹ18.63 فیصد کمی سے 4.01 ملین ٹن اور مجموعی فروخت صرف 6.21 فیصد کے باوجود ریکارڈ 33.88 ملین ٹن رہی، گزشتہ سال کی اسی مدت میں سیمنٹ کی مجموعی فروخت 31.901 ملین ٹن رہی تھی جس میں مقامی کھپت 26.973 ملین ٹن اور برآمدات 4.928 ملین تھیں۔

علاوہ ازیں اے پی سی ایم اے کے مطابق اپریل میں سیمنٹ کی فروخت 3.576 ملین ٹن اور پیداواری گنجائش کا استعمال 92 فیصد رہا، اس دوران مقامی کھپت 9.53 فیصدبڑھی، برآمد 50.75 فیصد کم رہی، گزشتہ ماہ افغانستان کو برآمد0.045 ملین ٹن اوربھارت ودیگر ملکوں کوبالترتیب 0.131 ملین اور 0.081 ملین ٹن رہیں۔