دہشتگردی کے واقعات میں آر ایس ایس اوربی جےپی ملوث ہیںبھارتی سیکریٹری داخلہ

دہشتگردی کے کئی واقعات میں ملوث کم از کم 10 افراد کا براہ راست تعلق آر ایس ایس سے ہے، بھارتی سیکریٹری داخلہ۔ فوٹو: فائل

---

بھارتی وزیر داخلہ کے بعد سیکریٹری داخلہ نے بھی سمجھوتہ ایکسپریس سمیت دہشتگردی کی کئی وارداتوں میں ہندو انتہا پسند تنظیم آر ایس ایس اور بی جے پی کے ملوث ہونے کی تصدیق کردی۔

بھارتی میڈیا کے مطابق آر کے سنگھ کا کہنا تھا کہ سمجھوتہ ایکسپریس ، حیدر آباد دکن کی مکہ مسجد اور خواجہ معین الدین چشتی کے مزار پر ہونے والی دہشت گردی کے واقعات میں آر ایس ایس اور بے جے پی ملوث ہیں، ان کا کہنا تھا کہ ان حملوں میں ملوث کم از کم دس افراد کا براہ راست تعلق راشٹریہ سیوک سنگھ سے ہے جس کے ثبوت موجود ہیں۔

بھارتی وزیر خارجہ سلمان خورشید نے بھی وزیر داخلہ کے بیان کو حقیقت پر مبنی قرار دیا ہے۔ ان کا کہنا ہے کہ دہشت گردی کو مذہب کی حمایت حاصل نہیں ہونی چاہئے،بھارت دہشت گردی کے خلاف ہے لیکن کچھ شہادتیں ایسی بھی ہیں جو ناقابل تردید ہیں۔

واضح رہے کہ بھارتی وزیر داخلہ نے کہا تھا کہ بھارت میں مسلمانوں سمیت اقلیتوں کے خلاف ہونے والی دہشت گردی کی متعدد وارداتوں میں آر ایس ایس اور بی جے پی ملوث ہے جس پر بی جے پی اور آر ایس ایس نے بھارتی وزیر داخلہ سشیل کمار شیندے سے اپنے بیان پر معافی مانگنے کا مطالبہ کرتے ہوئے دھمکی دی تھی کہ اگر انہوں نے معافی نہیں مانگی تو پھر لوک سبھا میں ان کے ساتھ باہمی تعلق خراب ہوسکتے ہیں۔