لاہور کے سرکاری اسپتالوں میں ینگ ڈاکٹرز کی ہڑتال آٹھویں روز بھی جاری

سرکاری اسپتالوں میں ینگ ڈاکٹرز کی ہڑتال آٹھویں روز بھی جاری ہے تاہم آؤٹ ڈورز کے باہر کیمپ لگا کر مریضوں کا معائنہ کیا جا رہا ہے۔


سروس اسٹرکچر سمیت دیگر مطالبات منظور نہ ہونے کے خلاف ینگ ڈاکٹرز سراپا احتجاج ہیں اور یہ سلسلہ آٹھویں روز میں داخل ہو چکا ہے۔ ینگ ڈاکٹرز سرکاری اسپتالوں کے آؤٹ ڈورز کے باہر کیمپ لگا کر چیک اپ تو کر رہے ہیں لیکن اس سے مریضوں کی مشکلات میں کمی نہیں آئی۔

علاج کے لئے پریشان ہونیوالے مریضوں نے ہڑتالی ڈاکٹروں کے خلاف سخت کارروائی کا مطالبہ کیا ہے ، دوسری جانب کیمپ لگا کر ڈیوٹی کرنے والے ڈاکٹرز کو غیرحاضر قرار دے کر فہرست محکمہ صحت کو بھجوا دی گئی ہے، جس سے ان کی تنخواہوں میں کٹوتی کی جائے گی۔