ون ڈے سیریز کیویز کی نگاہیں کلین سوئپ پر مرکوز

جنوبی افریقہ کو اب بحالی وقار کے لالے پڑچکے، تیسرا میچ آج پوشف اسٹروم میں ہوگا۔ فوٹو فائل

---

جنوبی افریقہ اور نیوزی لینڈ کے درمیان تیسرا اور آخری ون ڈے جمعے کو کھیلا جائے گا۔

کیویز نے نگاہیں کلین سوئپ پر مرکوز کرلی ہیں، مسلسل دو میچز میں فتوحات کی وجہ سے مہمان ٹیم کے حوصلے کافی بلند ہیں، دوسری جانب جنوبی افریقہ کو اب بحالی وقار کے لالے پڑچکے ہیں، روی کلینویلڈ کی جگہ ڈیل اسٹین کو واپس لایا جاسکتا ہے، انجرڈ اسپنر روبن پیٹرسن کی جگہ ایرون فانگیسو کا ڈیبیو متوقع ہے۔



نیوزی لینڈ کی جانب سے پلیئنگ الیون میں کسی تبدیلی کا امکان نہیں، وکٹ فلیٹ ہونے کی توقع ہے، یہ میزبان سائیڈ کیلیے خوش قسمت گرائونڈ ہے کیونکہ اسے یہاں پر کبھی شکست نہیں ہوئی۔آخری مرتبہ نیوزی لینڈ نے کسی بڑی ٹیم کے خلاف تین میچز کی سیریز میں کلین سوئپ 2006-07 میں کیا تھا جب اس نے ہوم گرائونڈز پر قریبی حریف آسٹریلیا کو پچھاڑا، جنوبی افریقہ کوکبھی اپنے ملک میں تین میچز کی سیریز میں وائٹ واش شکست نہیں ہوئی۔