سلمان خان کے ریئلٹی شو’’بگ باس‘‘ کے سیٹ پر آگ لگ گئی

خوش قسمتی سے کسی قسم کا کوئی جانی نقصان نہیں ہوا کیونکہ سکیورٹی گارڈ نے فوری طورپر فائربریگیڈ کو طلب کرلیا تھا،بگ باس انتظامیہ ، فوٹو : پبلسٹی

---

سلمان خان کے مشہور ریئلٹی شو بگ باس کے سیٹ پر شارٹ سرکٹ کے باعث آگ لگ گئی ۔

رپورٹ کے مطابق سلمان خان کے ریئلیٹی شو بگ باس کے سیٹ پر مشتمل گھر جلنے سے بال بال بچ گیا ، بگ باس کی انتظامیہ کے مطابق آگ گھر کے باہر سیٹ پر لگی جہاں سلمان خان بگ باس سے باہر ہوجانے والے افراد کے ساتھ شوٹنگ کیا کرتے تھے۔ آگ آج صبح 4 بجے کے قریب شارٹ سرکٹ کے باعث لگی۔

بگ باس کی انتظامیہ کا کہنا تھا کہ خوش قسمتی سے حادثے میں کوئی جانی نقصان نہیں ہوا اورنہ ہی کوئی زخمی ہوا کیونکہ سیکیورٹی گارڈ نے فوری طورپر فائر بریگیڈ کوطلب کرلیا تھا جس کے باعث صورتحال کنٹرول میں رہی تاہم آگ لگنے سے شوٹنگ کے کچھ آلات کو نقصان پہنچا لیکن زیادہ مالی نقصان نہیں ہوا۔