سپریم کورٹ نے کراچی میں ہیوی ٹریفک پرپابندی کا فیصلہ معطل کردیا

MIAMI:
سپریم کورٹ نے کراچی میں ہیوی ٹریفک پر پابندی سے متعلق سندھ ہائیکورٹ کا فیصلہ معطل کر دیا۔

چیف جسٹس ثاقب نثارکی سربراہی میں سپریم کورٹ کے 3 رکنی بینچ نے کراچی میں ہیوی ٹریفک کے داخلے پر پابندی سے متعلق سندھ ہائی کورٹ کے فیصلے کے خلاف کراچی پورٹ ٹرسٹ، سندھ حکومت اور ٹرانسپورٹر تنظیموں کی جانب سے دائر درخواستوں کی سماعت کی۔ عدالت نے سندھ ہائی کورٹ کے حکم کے خلاف تمام اپیلیں سماعت کے لئے منظور کرلیں۔

اس خبرکو بھی پڑھیں: کراچی میں ہیوی ٹریفک کے داخلے پر پابندی عائد


سماعت کے دوران سپریم کورٹ نے عدالت عالیہ کا فیصلہ معطل کرتے ہوئے قرار دیا کہ نقل و حرکت پر پابندی بنیادی حقوق کی خلاف ورزی ہے، سندھ ہائی کورٹ کا حکم سپریم کورٹ کے 17 اگست 2007 کے فیصلے کی خلاف ورزی ہے۔ عدالت کے حکم سے پورا کاروباری نظام جام ہو گیا۔ عدالت عظمیٰ نے فریقین کو نوٹس جاری کرتے ہوئے سماعت غیر معینہ مدت کے لئے ملتوی کردی۔

واضح رہے کہ سندھ ہائیکورٹ نے 31 مارچ کو کراچی میں ہیوی ٹریفک کے داخلے پرپابندی عائد کرتے ہوئے ریمارکس دیے تھے کہ ہیوی ٹریفک سے بھی دہشت گردی پھیلائی جارہی ہے، 15 ماہ میں 250 افرادکو ٹریفک حادثات میں ماردیا گیا۔