بالی ووڈ اداکارہ ہما قریشی کو پہلی سحری میں ماں کی یاد ستانے لگی

بالی ووڈ کی معروف اداکارہ ہما قریشی کو رمضان المبارک کی پہلی سحری میں والدہ کی کمی محسوس ہونے لگی جس کا اظہار انہوں نے ٹوئٹر پر کیا ہے۔

دنیا بھر میں ماہ صیام شروع ہوچکا ہے اورمسلمان اس بابرکت مہینے کی رحمتیں سمیٹنے میں مگن ہوچکے ہیں جب کہ اس رحمتوں والے مہینے میں شوبز سے تعلق رکھنے والے افراد بھی اپنی پیشہ وارانہ ذمہ داریوں کے ساتھ اس ماہ صیام کے روزے بھی رکھتے ہیں اوران ہی میں بالی ووڈ کی ابھرتی ہوئی اداکارہ ہما قریشی بھی شامل ہیں۔


بالی ووڈ اداکارہ ہماقریشی رمضان المبارک میں بھی اپنی فلموں کی شوٹنگ کے باعث گھر سے دور ہیں اور پہلے روزے کی سحری کے وقت اداکارہ کو والدہ کی یاد ستانی لگی جس پر اداکارہ نے ٹوئٹ کرکے اپنے جذبات کا اظہار کیا۔ اداکارہ ہماقریشی کااپنی ٹوئٹ میں کہنا تھا کہ رمضان المبارک کا مہینہ شروع ہوگیا ہے اور پہلی سحری کرتے ہوئے والدہ کی کمی محسوس کررہی ہوں جب کہ اللہ مجھے ہمت دے کیوں کہ روزے کی حالت میں بھی دن بھر مصروف رہوں گی ۔

واضح رہے کہ اداکارہ ہما قریشی اپنی فلموں ''دوبارہ''،''وائسرائے ہاؤس'' اور ''کالا'' کی شوٹنگ میں مصروف ہیں۔