پاکستان کا سعودی اتحاد میں شمولیت کے معاملے پر ’’ریڈ لائنز‘‘ کھینچنے کا فیصلہ

مقصد سے انحراف کیا گیا تونہ صرف امہ مزید تقسیم ہو جائے گی بلکہ فوجی اتحاد کو بھی نقصان ہوگا، حکام

Kamran Yousuf May 29, 2017

اتحاد کے ٹی او آرز فائنل کرنے کے لیے وزرائے دفاع کا اجلاس چند ہفتے میں ہوگا۔ فوٹو:فائل

پاکستان نے ہمسایہ ملک ایران سے تعلقات پر منفی اثرات سے بچنے کیلیے سعودی اتحاد میں قائم ہونے والے فوجی اتحاد میں شمولیت کے معاملے پر ''ریڈلائنز'' کھینچنے کا فیصلہ کیا ہے۔

ایکسپریس ٹریبیون کے مطابق اس معاملے پر نظرثانی کا فیصلہ ریاض میں ہونے والی حالیہ عرب اسلامک امریکا سربراہ کانفرنس میں سعودی حکام کے بیانات کے بعد کیا گیا جن میں کہا گیا تھا کہ اتحاد کا مقصد دہشت گردی کیخلاف جنگ کے ساتھ ساتھ ایران کو کاؤنٹر کرنا بھی ہے، حکومت اصولی طور پر سعودی اتحاد کا حصہ بننے پر تیار ہے اگر اسکا واحد مقصد دہشت گردی اور شدت پسندی کیخلاف لڑنا ہو تاہم حکام کے مطابق حتمی فیصلہ اس وقت ہوگا جب اتحاد کے ٹرمز آف ریفرنس (ٹی او آرز) تیار ہو جائیں گے، ٹی او آرز رکن ممالک کے وزرائے دفاع کے اجلاس میں فائنل کیے جائیں گے۔

ایک سینئر عہدیدار نے بتایا کہ پاکستان اپنی تجاویز وزرائے دفاع کے اجلاس میں پیش کرے گا جس کا انعقاد اگلے چند ہفتوں میں ہوگا، پاکستان تجویز پیش کرے گا کہ اتحاد کا واضح مقصد دہشتگردی کیخلاف جنگ ہونا چاہیے، اس سے انحراف کیا گیا تو نہ صرف امہ مزید تقسیم ہو جائے گی بلکہ فوجی اتحاد کو بھی نقصان ہوگا، ہمارا نکتہ نظر بہت واضح ہے کہ ہم صرف دہشت گردی کیخلاف جنگ کیلیے اس اتحاد میں شامل ہوں گے۔

ادھر ترجمان دفتر خارجہ نفیس زکریا نے بھی کہا کہ پاکستان نے بھی فوجی اتحاد میں شمولیت کا حتمی فیصلہ نہیں کیا، ابھی اس اتحاد کے ٹی او آرز کا فیصلہ ہونا باقی ہے، ہمیں قیاس آرائیوں میں الجھنے کے بجائے وزرائے دفاع کی میٹنگ کا انتطار کرنا چاہیے جس میں اس کی تمام جہتوں کا تعین کیا جائیگا۔