فہیم اشرف کی دھواں دار اننگز اہلخانہ خوشی سے سرشار

بیٹے کی کامیابی پر فخر، بھارت کے خلاف بھی اچھی کارکردگی دکھائیں گے، والد۔ فوٹو: ٹوئٹر

---

بنگلادیش کیخلاف وارم اپ میچ میں فہیم اشرف کی دھواں دار اننگز نے تماشائیوں کے ساتھ اہلخانہ کو بھی مسرور کردیا، قومی کھلاڑی کے والد بیٹے کی کامیابی پر فخر محسوس کررہے ہیں۔

بنگلادیش کیخلاف آئی سی سی چیمپئنز ٹرافی کے وارم اپ میچ میں فہیم اشرف کی پرفارمنس کی دھوم مچ گئی، نوجوان کرکٹر کی برق رفتار اننگز پر اہلخانہ بھی مسرور ہیں۔

میڈیا سے بات چیت میں فہیم کے والد کا کہنا ہے کہ بیٹا گلی محلے کی کرکٹ کھیل کر اس مقام پر پہنچا، اللہ کا جتنا شکر کیا جائے کم ہے۔ بیٹسمین کے بڑے بھائی کا کہناکہ فہیم کو بچپن سے کرکٹ کا جنون کی حد تک شوق تھا۔ فہیم اشرف کے اہلخانہ کا یہ بھی کہنا تھا کہ اگر انھیں بھارت کیخلاف کھیلنے کا موقع ملا تو وہ قوم کی امیدوں پر پورا اتریں گے۔

واضح رہے کہ وارم اپ میچ میں پاکستان بنگلہ دیش کے خلاف ہارا ہوا میچ 2 وکٹوں سے جیت گیا۔ قومی ٹیم نے یہ فتح فہیم اشرف کی دھواں دھار ناٹ آؤٹ اننگز کی بدولت حاصل کی۔ انھوں نے30 گیندوں پر 64 رنز بنائے، بنگلہ دیش نے چیمپئنز ٹرافی کے وارم اپ میچ میں پاکستان کو جیتنے کیلیے342 رنز کا بڑا ہدف دیا تھا جس کو حاصل کرنا قومی ٹیم کیلیے ناممکن نظر آرہا تھا لیکن فہیم اشرف کی شاندار بیٹنگ نے میچ کا پانسہ پلٹ دیا اور اس طرح پاکستان یہ میچ 2 وکٹ سے جیت گیا۔

پاکستان کو میچ جتوانے والے23 سالہ آل راؤنڈر فہیم اشرف کا تعلق قصور سے ہے، وہ بائیں ہاتھ سے بیٹنگ اور دائیں ہاتھ سے بولنگ کرتے ہیں اور فرسٹ کلاس میں وہ فیصل آباد اور سوئی ناردرن گیس کی نمائندگی کرچکے ہیں۔ وہ 31 فرسٹ کلاس میچز میں1207 رنز بناچکے ہیں جن میں 2 سنچریاں اور 4 نصف سنچریاں شامل ہیں جبکہ وہ 94 وکٹیں بھی حاصل کرچکے ہیں۔