سائٹ پولیس مقابلے میں ڈاکو ہلاک راہ گیر زخمی

محمود آباد پولیس نے اختر کالونی کے قریب اسٹریٹ کرائم کی وارداتوں میں ملوث ایک ڈاکو قیصر کو مقابلے کے بعد گرفتار کرلیا۔ فوٹو: فائل

---

سائٹ سیمنز چورنگی کے قریب پولیس مقابلے کے دوران فائرنگ سے ایک ڈاکو ہلاک جبکہ اس کے 2 ساتھی فرار ہونے میں کامیاب ہو گئے۔

ملزمان کی فائرنگ سے راہگیر زخمی ہو گیا، تفصیلات کے مطابق سیمنز چورنگی اسٹیٹ ایونیو بینک ایریا میں لوٹ مار کر کے فرار ہونیوالے 3 ملزمان نے پولیس پارٹی کو دیکھ کر فائرنگ شروع کر دی جس میں ایک راہگیر 25 سالہ محمد عمران ولد محمد گلزار زخمی ہو گیا، پولیس کی جوابی فائرنگ سے ایک 40 سالہ ڈاکو زخمی ہو گیا جبکہ 2 ڈاکو پولیس پر فائرنگ کرتے ہوئے فرار ہو گئے۔

پولیس نے زخمی ہونے والے ڈاکو کے قبضے سے ٹی ٹی پستول ، ایک موٹر سائیکل اور محمد وسیم نامی شخص سے چھینی ہوئی نقدی اور موبائل فون برآمد کر کے ملزم اور راہگیر کو اسپتال پہنچایا جہاں ملزم دوران علاج زخموں کی تاب نہ لاتے ہوئے ہلاک ہو گیا، ہلاک ملزم کی شناخت نہیں ہوسکی، علاوہ ازیں محمود آباد پولیس نے اختر کالونی کے قریب اسٹریٹ کرائم کی وارداتوں میں ملوث ایک ڈاکو قیصر کو مقابلے کے بعد گرفتار کرلیا۔