سندھ حکومت اور آئی جی میں کشیدگی سے پولیس کا نظام درہم برہم

ایڈیشنل آئی جی کراچی اورڈی آئی جیز سمیت کئی افسران حکومت کی ٹیم اور کچھ آئی جی کے ہم خیال ہیں

Muhammad Yaseen June 16, 2017

حسین آباد،ناظم آباد ،جمشید کوارٹر ، گارڈن ،لیاری اورمحمود آباد میں جوئے، سٹے اور منشیات کے اڈے کھلے ہوئے ہیں۔ فوٹو: فائل

RIYADH: سندھ حکومت اور آئی جی سندھ میں مبینہ اختلافات کے باعث پولیس کا نظام درہم برہم ہوگیا.

ایڈیشنل آئی جی کراچی اورڈی آئی جیز سمیت کئی اہم سیٹوں پر براجمان پولیس افسران سندھ حکومت کی ٹیم میں جبکہ چند ایک ایسے افسران جو وفاقی حکومت سے اچھے تعلقات چاہتے ہیں وہ آئی جی سندھ کی ٹیم میں شامل ہیں،سندھ حکومت اور پولیس افسران کے اختلافات کے باعث افسران بالا نے تھانوں کی طرف توجہ کم کر دی ہے جس کا فائدہ اٹھاتے ہوئے ایس ایس پی اور ایس پی کی سطح کے افسران نے مبینہ طور پر شہر بھر میں جوئے اور منشیات کے اڈے آباد کرانے کی اجازت بھی دینی شروع کردی۔

ذرائع نے بتایا کہ اس وقت پورے شہر میں 150 سے زائد جوئے اور منشیات کے اڈے علاقہ پولیس کی مبینہ اجازت سے کام کر رہے ہیں جبکہ شراب اور دیگر غیر قانونی کام بھی کرائے جا رہے ہیں ، پولیس ذرائع نے بتایا کہ سب سے زیادہ جوئے اور منشیات کے اڈے ضلع ملیر کے تھانے شاہ لطیف ، قائد آباد ، ملیر سٹی ، سکھن ، اسٹیل ٹاؤن سمیت دیگر تھانوں میں ہیں جبکہ عزیز آباد کے علاقے حسین آباد ، جوہر آباد کے علاقے فیڈرل بی ایریا جاوید نہاری کی عقبی گلی میں عتیق کا جوئے کا اڈا ، ناظم آباد تھانے کی حدود چھوٹا میدان میں فقیرا کا جوئے سٹے ، اور دیگر کرمنل گیمز کا اڈا ، عزیز بھٹی کے علاقے ڈالمیا توفیق نامی شخص کا جوئے کا اڈا جبکہ جمشید کوارٹر ، گارڈن اور لیاری سمیت پورے شہر میں جوئے، سٹے اور منشیات کے اڈے کھلے ہوئے ہیں۔

ذرائع نے بتایا کہ شہر کا سب سے بڑا جوئے کا اڈا محمود آباد میں برطرف آل محمد نامی پولیس اہلکار کا ہے، شہر بھر میں جوئے کا کاروبار کرنے والے آل محمد سے رابطہ کرنے کی کوشش میں لگے ہوئے ہیں تاکہ انھیں بھی محمود آباد میں چھوٹا موٹا اڈا کھولنے کی جگہ مل جائے کیونکہ آلے کے پولیس افسران سے مبینہ طور پر تعلقات بہت اچھے ہیں اور سب کو معلوم ہے کہ آلے جس مقام پر جوا کھلنے کی اجازت دلوائے گا وہاں کوئی بھی چھاپہ نہیں مارے گا۔

ذرائع نے بتایا کہ سندھ حکومت اور آئی جی سندھ کے مبینہ اختلافات کے باعث ایڈیشنل آئی جی کراچی مشتاق احمد مہر اور آئی جی سندھ اے ڈی خواجہ میں بھی رابطہ منقطع ہے ، جبکہ ڈی آئی جیز بھی شہر کے کسی بھی مسئلے پر آئی جی سندھ کو اعتماد میں لینے کے بجائے ایڈیشنل آئی جی کراچی اور وزیر داخلہ کو اعتماد میں لیتے ہیں۔

ذرائع نے بتایا کہ ایڈیشنل آئی جی کراچی نے پولیس افسران کو یقین دہانی کرائی ہے کہ آئی جی سندھ انھیں معطل یا ریورڈ نہیں کرسکتے ان سے یہ اختیار لے لیا گیا ہے لہذا اگر سندھ میں کسی سیٹ پر نوکری کرنی ہے،آئی جی سندھ کی بات سنی ان سنی اور وزیر داخلہ کی بات ماننی پڑے گی۔