ہاں پاکستان تم نے ہمیں شکست دیدی رشی کپورکی ٹوئٹ

پاکستان انگلینڈ کو شکست دے کرجب فائنل میں پہنچا تھا تو رشی کپور نے لکھا کہ اب بھارت سے ہارنے کے لیے تیار رہیں۔ — فائل فوٹو

---

چیمپیئنز ٹرافی کرکٹ ٹورنامنٹ کے فائنل سے قبل پاکستان کے خلاف ہرزہ سرائی کرنے والے بھارتی ادارکا سماجی رابطوں کی ویب سائٹ پر فائنل میچ کے دوران مکمل خاموش نظر آئے کیوں کہ پاکستان کرکٹ ٹیم نے میچ کے آغاز سے ہی بھارتی ٹیم کو دباؤ میں رکھا اور انہیں جشن منانے کا کوئی موقع فراہم نہیں کیا۔

بھارت کی بیٹنگ کے دوران جب ہردیک پانڈیا نے یکے بعد دیگرے چھکے لگانے شروع کیے تو رشی کپور کو اپنی خفت مٹانے کا موقع مل گیا اور انہوں نے ٹوئیٹر پر اپنے پیغام میں ہردیک پانڈیا کی تعریف کرتے ہوئے ان کا موازنہ پاکستانی بیٹسمین فخر زمان سے کردیا جن کی شاندار سنچری کی بدولت پاکستان نے بھارت کو گھٹنے ٹیکنے پر مجبور کیا۔

Hard ik is our Fakhar! Lol

— Rishi Kapoor (@chintskap) June 18, 2017

اپنے ٹوئیٹر پیغام میں رشی کپور نے صرف اتنا ہی کہا کہ 'ہردیک ہمارا فخر ہے' اور اس کے آگے انہوں نے قہقہے کے لیے استعمال ہونے والا لفظ lols استعمال کیا۔

بعد ازاں اپنے ٹوئیٹ میں رشی کپور نے اپنی شکست تسلیم کرتے ہوئے پاکستان کرکٹ ٹیم کی تعریف بھی کی۔ انہوں نے کہا کہ 'ہاں پاکستان، تم نے ہمیں شکست دے دی، بہت اچھا کھیل پیش کیا، ہر شعبے میں ہمیں پچھاڑ دیا، بہت بہت مبارک ہو، میں شکست تسلیم کرتا ہوں، آپ کے لیے نیک تمنائیں'۔

Yes Pakistan, you have defeated us. Well played, outplayed us in all departments. Many congratulations, I concede. Best wishes!

— Rishi Kapoor (@chintskap) June 18, 2017

خیال رہے کہ جب پاکستان انگلینڈ کو شکست دے کر چیمپیئنز ٹرافی کے فائنل میں پہنچا تھا تو رشی کپور نے لکھا تھا کہ 'مبارک ہو پاکستان! آپ فائنلز میں آگئے؟ لیکن اب بھارت سے ہارنے کے لیےتیار رہیں۔

پاکستان مخالف بیانات پر رشی کپور کو ٹوئیٹر صارفین نے شدید تنقید کا نشانہ بھی بنایا تھا تاہم رشی کپور کے منفی بیانات کا سب سے بہترین جواب پاکستان کرکٹ ٹیم نے اپنی شاندار پرفارمنس سے دیا جس سے نہ صرف رشی کپور بلکہ تمام ناقدین کے منہ بند ہوگئے۔