چیمپئینز ٹرافی جیتنے والی قومی ٹیم کا وطن واپسی پر شاندار استقبال

سرفراز اور رومان کراچی، شاداب اور عماد اسلام آباد، حارث سہیل سیالکوٹ، فخر زمان پشاور جب کہ حسن اور بابر لاہور پہنچے

ویب ڈیسک June 20, 2017

لاہور پہنچنے والے قومی کرکٹ ٹیم کے کھلاڑیوں میں بابر اعظم، حسن علی، احمد شہزاد اور فہیم اشرف شامل ہیں۔ فوٹو: پی سی بی

چیمپئنر ٹرافی کی فاتح قومی ٹیم کے کھلاڑیوں کا وطن واپس پہنچنے پر والہانہ استقبال کیا گیا۔

کپتان سرفراز احمد اورفاسٹ بولر رومان کراچی پہنچے تو گورنر سندھ محمد زبیر، میئر کراچی وسیم اختر، صوبائی وزیر کھیل سردار محمد بخش مہر اور دیگر اہم شخصیات نے ان کا پرتپاک استقبال کیا۔ قومی ہیروز کو دیکھ کر وہاں موجود لوگ بھی جذباتی ہوگئے اور پورا ایئرپورٹ پاکستان زندہ باد اور جیوے جیوے پاکستان کے نعروں سے گونج اٹھا۔ اس موقع پرعوام نے قومی ہیروز کے ساتھ سیلفیاں لیں اور وڈیوز بنائیں۔ بعد ازاں سرفراز احمد اپنے گھر پہنچے تو قومی جوش و جذبے سے لبریز عوام کی بڑی تعداد وہاں موجود تھی۔

سرفرازنے اپنی رہائش گاہ سے سے مداحوں کو آئی سی سی چیمئپنز 2017 کی ٹرافی دکھائی، انہوں نے لوگوں کے ہمراہ پاکستان زندہ باد کے نعرے لگائے اورموقع موقع بھی گنگنایا۔

اس سے کچھ ہی دیر قبل قومی کرکٹ ٹیم کے چار کھلاڑی احمد شہزاد، حسن علی، بابر اعظم اور فہیم اشرف 3 ٹیم آفیشلز کے ہمراہ دبئی سے لاہورپہنچے۔ ان کا استقبال وزیر کھیل رانا مشہود احمد اور میئر لاہور نے کیا۔ ایک سنچری اوردو ففٹیاں بنانے والے قومی ٹیم کے اوپنرفخرزمان پشاورایئرپورٹ پہنچے جہاں ان کا والہانہ استقبال کیا گیا، جس کے بعد وہ اپنے آبائی علاقے کاٹلنگ روانہ ہوگئے۔ گھر پہنچنے پر بھی فخر زمان کا شاندار انداز میں استقبال کیا گیا۔

دوسری جانب شاداب خان اور عماد وسیم اسلام آباد ایئرپورٹ پہنچے لیکن صورت حال اس وقت بدمزگی کا شکارہوئی جب دونوں قومی ہیروز کے گھر والوں کو ہی راول لاؤنج میں جانے نہیں دیا گیا۔ اس موقع پر شاداب کے بھائی کا کہنا تھا کہ ہمیں اپنے ہی بھائی کے استقبال کے لئے جانے نہیں دیا جارہا، انتظامیہ کو کئی بار بتایا کہ شاداب ہمارا بھائی ہے مگر کوئی نہیں سن رہا۔

آئی سی سی میگا ایونٹ کے پلئیرز آف دی ٹورنامنٹ حسن علی بھی اپنے آبائی علاقے پہنچ گئے ہیں، جہاں لوگوں کا جوش و خروش دیدنی ہے۔ نوجوانوں نے قومی ہیرو کو دیکھتے ہی پاکستان زندہ باد کے نعرے لگانے شروع کردئے۔ اس کے علاوہ حارث سہیل بھی سیالکوٹ پہنچ گئے ہیں۔

واضح رہے کہ شعیب ملک، محمد حفیظ، جنید خان اور اظہر علی اب بھی نجی مصروفیات کی وجہ سے برطانیہ میں موجود ہیں۔