بطور کھلاڑی انیل کمبلے کا احترام کرتا ہوں ویرات کوہلی

ڈریسنگ روم میں ہونے والے معاملے کو عوامی سطح پر نہیں اٹھا سکتا، کوہلی۔ فوٹو: فائل

---

بھارتی ٹیم کے کپتان ویرات کوہلی کا کہنا ہے کہ ڈریسنگ روم میں ہونے والا معاملہ نجی ہے اور تمام اختلافات کے باوجود بطور کھلاڑی مستعفی ہونے والے کوچ انیل کمبلے کا احترام کرتا ہوں۔

دورہ ویسٹ انڈیز کے دوران صحافیوں کے سوال کے جواب میں کوہلی نے کہا کہ ڈریسنگ روم میں جو ہوتا ہے وہ ایک نجی معاملہ ہے، اس معاملے پر عوامی سطح پر بالکل بھی بات نہیں کروں گا۔ انہوں نے کہا کہ وہ ایک کرکٹر کے طور پر سابق اسپنر کی عزت کرتے ہیں اور ان کے فیصلے کا بھی احترام کرتے ہیں۔

اس خبر کو بھی پڑھیں: بھارتی کرکٹ ٹیم کے کوچ انیل کمبلے مستعفیٰ

واضح رہے کہ ویرات کوہلی نے انیل کمبلے سے اختلافات کے بعد 12 ماہ قبل کوچ نامزد ہونے پر مبارکباد کی ٹویٹ ہٹا دی تھی، بھارتی کرکٹ ٹیم کے کوچ انیل کمبلے کا ایک سالہ معاہدہ چیمپئنز ٹرافی کے ساتھ اختتام پذیر ہو گیا تھا تاہم اس کے فورا بعد دورہ ویسٹ انڈیز کیلیے انہیں ہی بطور کوچ ٹیم کے ساتھ جانا تھا۔

اس خبر کو بھی پڑھیں: انیل کمبلے کا پتہ صاف کرنے والے کوہلی ' ولن ' بن گئے

ویرات کوہلی کے ساتھ اختلافات کے بعد ایک اور معاملہ سامنے آیا اور چیمپئنز ٹرافی کے فائنل میں پاکستان کے ہاتھوں ٹیم کی عبرتناک شکست کے بعد انیل کمبلے کی جانب سے ڈریسنگ روم میں ایک پلیئر کے ساتھ ہتک آمیز برتاﺅ کرنے کی اطلاعات سامنے آئی تھیں، جس کے بعد بی سی سی آئی عہدیداروں نے بھی کمبلے کی حمایت سے ہاتھ کھینچ لیا اور انہیں مجبوراً مستعفی ہونا پڑا۔