چیمپیئنز ٹرافی کا بہترین لمحہ عامر کی گیند پر کوہلی کی وکٹ قرار

آئی سی سی نے فائنل میں ویرات کوہلی کے آؤٹ ہونے کی ویڈیو شیئر کی اور عامر کو مبارکباد پیش کی — فوٹو فائل

---

انٹرنیشنل کرکٹ کونسل نے لندن میں کھیلے گئے چیمپیئنز ٹرافی کرکٹ ٹورنامنٹ کے بہترین لمحے کا اعلان کردیا اور یہ لمحہ کوئی اور نہیں بلکہ پاکستان اور بھارت کے درمیان ہونے والے فائنل میچ کا ایک سنسنی خیز لمحہ ہے جب محمد عامر نے بھارتی کپتان ویرات کوہلی کو آؤٹ کیا تھا۔

آئی سی سی کی جانب سے جاری بیان کے مطابق کونسل کے آفیشلز نے باہمی ووٹنگ سے چیمپیئنز ٹرافی 2017 کے بہترین لمحے کا انتخاب کیا اور وہ پاکستانی فاسٹ بولر محمد عامر کی جانب سے بھارتی کپتان ویرات کوہلی کو آؤٹ کیے جانے کا لمحہ تھا۔

Congratulations to @iamamirofficial, claiming the wicket of @imVkohli in the #CT17 final has been voted the @Nissan Play of the Tournament! pic.twitter.com/nIfrCgMmJh

— ICC (@ICC) June 24, 2017

خیال رہے کہ چیمپیئنز ٹرافی کے فائنل میں پاکستان نے پہلے بیٹنگ کرتے ہوئے 338 رنز بنائے تھے جبکہ ہدف کے تعاقب میں بھارت کی پہلی وکٹ پہلے ہی اوور میں گر گئی تھی جب محمد عامر نے روہت شرما کو ایل بی ڈبلیو کردیا تھا۔ محمد عامر اپنا دوسرا اوور کرنے آئے تو ان کے سامنے بھارتی کپتان ویرات کوہلی موجود تھے۔ عامر نے اس موقع پر شاندار گیند کی اور گیند ویرات کوہلی کے بلے سے لگنے کے بعد سلپ پر اظہر علی کے پاس گئی لیکن انہوں نے کیچ گرادیا۔

اس موقع پر محمد عامر سمیت پاکستانی شائقین کو بھی شدید دھچکا لگا کیوں کہ یہ بھارتی کپتان ویرات کوہلی کا کیچ تھا اور اس کی وجہ سے میچ کا نتیجہ پاکستان کے خلاف ہوسکتا تھا تاہم محمد عامر نے ہمت نہیں ہاری اور اگلی ہی گیند پر دوبارہ ویرات کوہلی کو پریشان کردیا، کوہلی نے اسٹروک کھیلا لیکن آف سائیڈ پر کھڑے شاداب خان نے اس بار کوئی غلطی نہیں کی اور کیچ کرلیا اور یہی میچ کا ٹرننگ پوائنٹ ثابت ہوا۔

آئی سی سی نے سماجی رابطوں کی ویب سائٹ ٹوئٹر پر محمد عامر کی اسی گیند کی ویڈیو پوسٹ کی ہے اور اسے چیمپیئنز ٹرافی کا بہترین لمحہ قرار دیتے ہوئے محمد عامر کو مبارکباد بھی دی ہے۔