ہنگو دھماکے میں جاں بحق افراد سپردخاک‘رقت آمیز مناظر‘ فضا سوگوار

صوبائی حکومت نے ہر شہیدکو3 لاکھ اور ہر شدید زخمی کو ایک لاکھ امداد کا اعلان کردیا. فوٹو: اے ایف پی

---

ہنگوخودکش دھماکے میں جاں بحق افراد کو سپردخاک کردیا گیا اس موقع پر رقت آمیز مناظر دیکھنے میں آئے ہفتے کو شہر کے کاروباری مراکز اور تعلیمی ادارے بند رہے شہر میں سیکیورٹی انتظامات سخت کردیے گئے ۔

ہنگو بازار میں خود کش دھماکے میں 2پولیس اہلکاروں سمیت 28افراد جاں بحق اور50زخمی ہوئے تھے۔ دھماکے کے دوسرے روز ہنگو شہر اور مضافاتی علاقوں سے تعلق رکھنے والے جاں بحق افراد کو آبائی قبرستانوں میں سپردخاک کردیا گیا۔شہر کی فضا دوسرے روز بھی سوگوار رہی۔ میونسپل کمیٹی کے عملے نے چیف میونسپل آفیسر اختر منیر کی سرپرستی میں جائے وقوع سے ملبہ ہٹایا اور صفائی کا کام مکمل کردیا۔



دریں اثنا کمشنر کوہاٹ ڈویژن صاحبزادہ محمد انیس نے صحافیوں کو پریس بریفنگ دیتے ہوئے کہا کہ دہشت گردی کے خاتمے اور مذہبی ہم آہنگی کے فروغ کے لیے تمام مکاتب فکر کو متحد ہونا ہوگا ہنگو حساس علاقہ ہے فورسز کے آپریشن کے باعث دہشت گردوں کے نشانے پر ہے۔ انھوں نے کہا کہ صوبائی حکومت شہداء کو تین تین لاکھ جبکہ شدید زخمیوں کو ایک ایک لاکھ روپے کی مالی امداد فراہم کرے گی۔