برطانیہ نے ویمنز فٹبال سپرپاور برازیل کی سٹی گم کردی

سیمی فائنل میںرسائی کیلیے کل کینیڈا سے مقابلہ ہوگا،امریکانے شمالی کوریا کو ہرا دیا ، اے ایف پی

---

KARACHI: اولمپکس ویمنز فٹبال ایونٹ کی کوارٹر فائنل لائن اپ مکمل ہوگئی، سیمی فائنل میں رسائی کیلیے جمعے کو میزبان برطانیہ کا سامنا کینیڈا سے ہوگا، دفاعی چیمپئن امریکی ٹیم نیوزی لینڈ سے ٹکرائے گی،برازیل اور جاپان کا میچ ہونا ہے جبکہ فرانس اور سوئیڈن کی ٹیمیں بھی برسرپیکار ہوں گی۔

منگل کی شب آخری لیگ میچز میں برطانیہ نے1-0 سے شکست دے کر ویمنز فٹبال سپرپاور برازیل کی سٹی گم کر دی،فیصلہ کن گول دوسرے منٹ میں اسٹیفنی ہونگٹن نے داغا،دوسرے ہاف کے شروع میں برازیلین گول کیپر آندریا نے پنالٹی روک کر اپنی ٹیم کے مقابلے میں واپسی کی امید روشن رکھی مگر مقابلہ برابر بھی نہ کیا جا سکا،ویمبلے اسٹیڈیم پر70 ہزار شائقین اس میچ کو دیکھنے کیلیے آئے تھے۔

برطانوی ٹیم لیگ مرحلے کے تینوں میچز میں فتحیاب رہی۔ دفاعی چیمپئن امریکا نے شمالی کوریا کو 1-0 سے مات دے کر رائونڈ8 میں جگہ بنائی، فیصلہ کن گول ایبی وامبیچ نے بنایا، فرانس نے کولمبیا کو1-0 سے زیر کرکے کوارٹر فائنل میں نشست پائی، میچ کا واحد گول ایلوڈی تھومس کے نام رہا، نیوزی لینڈ کی ٹیم نے کیمرون پر 3-1 سے ہاتھ صاف کیا۔