شہریوں نے ڈاکو کو پکڑلیا زندہ جلانے کی کوشش

شاہ پورچاکر کے مین صرافہ بازار کے سنار کاشف رضا اپنی دکان بند کرکے طلائی زیورات لے کر اپے گھر جارہا تھا کہ راستے میں 2 ڈاکوئوں نے اسلحے کے زور پراس سے طلائی زیورات کی تھیلی اور نقد رقم، موبائل فون چھین کر جانے لگے تو سنار نے مزاحمت کی جس پر ڈاکوئوں نے شدید تشدد کرکے زخمی کردیا۔

سنارکے شور مچانے پر شہری جمع ہوگئے اور انھوں نے ڈاکوئوں کا تعاقب کرکے ایک ڈاکو کو پکڑلیا جس کا نام علی مراد بتایا جاتا ہے۔ شہریوں نے ڈاکو پر تشدد کیا اور زندہ جلانے کی کوشش کی۔




اس دوران مقامی پولیس بیچ میں آگئی اور پولیس ڈاکو کو حراست میں لے کر تھانے کی بجائے کسی نامعلوم مکان پر لے گئی بعدازاں شہری تھانے پہنچے اور شدید احتجاج کرنے لگے،ایس ایچ او کے مطابق فرار ہونے والے ڈاکو کو بھی جلد گرفتار کر لیاجائیگا۔ ڈاکو سے ایک پستول، 7 گولیاں اور موٹر سائیکل برآمد کرلی گئی ہے، پولیس فرار ہونے والے ڈاکو کا نام بتانے سے گریز کررہی ہے۔