مالی کی دہشت سے جنوبی افریقی امیدوں کے پھول مرجھاگئے

گھانا نے پہلی مرتبہ ٹورنامنٹ میں حصہ لینے والے کیپ ورڈے کی غیر معمولی مہم کا خاتمہ کرتے ہوئے 2-0 سے میدان مار لیا۔ فوٹو : اے ایف پی

---

KARACHI: افریقہ کپ آف نیشنز میں کھیلے جانے والے کوارٹر فائنل میں مالی نے میزبان جنوبی افریقہ کے خواب کو چکنا چورکردیے۔

ڈرا مقابلے کے بعد پنالٹیز پر 3-1 سے برتری کی بدولت سیمی فائنل میں جگہ پکی کرلی، گھانا نے پہلی مرتبہ ٹورنامنٹ میں حصہ لینے والے کیپ ورڈے کی غیر معمولی مہم کا خاتمہ کرتے ہوئے 2-0 سے میدان مار لیا۔ تفصیلات کے مطابق جنوبی افریقہ1996 کی طرح اپنے ہی میدان میں ٹرافی جیتنے کا خواب سجائے ہوئے تھا کہ مالی نے اس کی سیمی فائنلز میں پہنچنے کی کوششوں کو سبوتاژ کردیا۔ ڈربن میں تماشایوں سے بھرے گراؤنڈ میں دونوں ملکوں کے مابین مقابلہ ایکسٹرا ٹائم کے اختتام تک 1-1 گول سے برابر رہا۔

میچ کا پہلا گول جنوبی افریقہ کے ٹوکیلو رانتی نے 31ویں منٹ میں کیا تاہم مالی کے سیدو کیلٹا نے 58ویں منٹ میں گیند کو جال میں پھینک کر میچ برابر کردیا۔ تناؤ سے بھرپور پنالٹی شوٹ آؤٹ میں مالی نے نے 3-1 سے میدان مارلیا۔ شیک ٹیڈیانے ڈایاباٹے، اداما تمبورا اور ماھامانے ترورے نیگیند کو جال کی راہ دکھائی۔ مالی کے کپتان نے میچ کے بعد کہا کہ یہ فتح ہمارے لیے بہت اہمیت رکھتی ہے ، مالی کا جھنڈا جو نہ صرف مالی کے شمال اور جنوب میں بلکہ اب مالی سے باہر بھی لہرارہا ہے ، ہماری طرح مالی کے تمام لوگوں کو بھی فخر ہونا چاہیے۔

کوچ پیٹرس کیرٹیرون کہتے ہیں کہ میں جانتا تھا کہ ہم جنوبی افریقہ کے پہلے گول کے بعد میچ میں ضرور واپس آئیں گے، اس لیے میں نے ہالف ٹائم پر ٹیم کو دوبارہ منظم کیا ، مجھے بہت خوشی ہے اور اپنی کارکردگی اور توانائی پر جو کھلاڑیوں نے فراہم کی فخر ہے۔ میچ کے بعد پریس کانفرنس سے خطاب کرتے ہوئے جنوبی افریقن کوچ گورڈن اگیسنڈ نے روہانسی صورت میں میڈیا کو بتایا کہ میرے کھلاڑیوں کو عزت ، وقار اور جذبے کے ساتھ شکست ہوئی ہے، ایک کوچ اپنی ٹیم سے بس اتنا ہی توقع کرسکتا تھا ، میرے لڑکوں نے جیت کی پوری کوشش کی ، اتنے اچھے کھیل کے بعد ہار کو قبول کرنا بہت مشکل ہے۔

اب ڈربن میں ہونے والے سیمی فائنل میں مالی کا مقابلہ آئیوری کوسٹ اور نائیجیریا کے مابین کھیلے جانیوالے کواٹرفائنل کے فاتح جبکہ گھانا فائنل فور میں برکینا فاسو یا ٹوگو سے مقابلہ کرے گا۔ اس سے قبل پورٹ ایلزبتھ کے ساحل کے قریب گھانا کے متبادل کھلاڑی مبارک واکاسو نے بلیک اسٹارز کو 54ویں منٹ میں فوقیت دلائی جب انھوں نے کپتان اسامواہ گیان کے باکس میں فاؤل ہونے سے ملنے والی پنالٹی پر گیند کو گول پوسٹ کے اندر پھینک دیا۔ آخری لمحوں میں واکاسو نے گھانا کے فائدے کو دگنا کیا جب انھوں نے میدان کا آدھا فاصلہ طے کرتے ہوئے گول اسکور کیا ۔