پاکستان کے محمد سجاد نے ایشین سکس ریڈ اسنوکر چیمپئن شپ جیت لی

محمد سجاد نے سیمی فائنل میں پاکستان ہی کے محمد بلال کو شکست دی تھی — فوٹو : فائل

---

پاکستانی کیوئسٹ محمد سجاد نے ہانگ کانگ کے لی چُن وائی کو0-7 سے شکست دے کر ایشین سکس ریڈ اسنوکر چیمپئن شپ جیت لی۔

کرغزستان میں کھیلے گئے ایشین سکس ریڈ اسنوکر چیمپئن شپ میں محمد سجاد نے شاندار کارکردگی کا مظاہرہ کرتے ہوئے مخالف کھلاڑی کو مکمل طور پر آؤٹ کلاس کرتے ہوئے سات صفر سے شکست دے دی۔ سیمی فائنل میں محمد سجاد نے پاکستان ہی کے محمد بلال کو 3-6 سے شکست دی تھی۔

واضح رہے کہ یہ محمد سجاد کا دوسرا بڑا بین الاقوامی ٹائٹل ہے، اس سے قبل انہوں نے 2013 میں آئرلینڈ میں ہونے والی ورلڈ چیمپئن شپ میں کامیابی حاصل کی تھی۔ ایشین سکس ریڈ چیمپئن شپ میں یہ پاکستان کی دوسری کامیابی ہے ، اس سے قبل قطر میں ہونے والے ایونٹ میں پاکستان کے محمد آصف نے کامیابی حاصل کی تھی۔