اگلے 10 سال میں جموں و کشمیر آزاد ہوجائے گا سابق مذاکرات کار برائے مقبوضہ کشمیر

مسئلے کو حل کرنے کے لیے سنجیدہ کوششیں نہ کی گئیں تو بھارت اگلے 10 برس میں کشمیر کو کھو سکتا ہے، رادھا کمار۔ فوٹو: فائل

---

ISLAMABAD: بھارت کی سابق مذاکرات کار نے اگلے 10 سال میں مقبوضہ کشمیر کی آزادی کا امکان ظاہر کردیا ہے، جب کہ برہان وانی کی برسی قریب آنے پر پوری وادی میں صورت حال انتہائی کشیدہ ہے۔

کشمیر میڈیا سروسس کے مطابق نئی دلی میں سیمینار سے خطاب کرتے ہوئے سابق بھارتی مذاکرات کار برائے مقبوضہ کشمیر اور سول سوسائٹی کی رکن پروفیسر رادھا کمار نے کہا کہ اگر مسئلے کو حل کرنے کے لیے سنجیدہ کوششیں نہ کی گئیں تو بھارت اگلے 10 برس کے دوران کشمیر کو کھو سکتا ہے۔

دوسری جانب غیرملکی خبررساں ایجنسی اے ایف پی کے مطابق 8 جولائی کو حزب المجاہدین کے نوجوان کمانڈر برہان وانی کی پہلی برسی کے موقع پر پوری وادی میں حالات نہایت کشیدہ ہیں۔ بھارتی فورسز نے زیادہ تر حریت پسند رہنماؤں کو نظر بند کر دیا اور وادی میں موبائل فون سروس بھی معطل کر دی گئی، جب کہ 21 ہزار اضافی اہلکار تعینات کر دیے گئے ہیں۔ نہتے مظاہرین پر قابض فورسز کی فائرنگ سے زخمی افراد سے اسپتال بھرے ہوئے ہیں۔

علاوہ ازیں ڈیموکریٹک فریڈم پارٹی کے رہنما شبیر شاہ نے کشمیری مجاہد کی برسی کے موقع پر برہان وانی کو تمغہ جرات دینے کا اعلان کیا ہے۔

ادھر بھارتی فوج کا ایک اہلکار منحرف ہوکر اسلحہ سمیت کشمیری حریت پسندوں سے جاملا۔ پلوامہ سے تعلق رکھنے والا ظہور احمد ٹھوکر گزشتہ رات گئے سے بارہ مولا میں اپنی چھاؤنی سے غائب تھا جس کی بڑے پیمانے پر تلاش کی گئی جس کے بعد اسے مفرور قرار دے دیا گیا۔

دریں اثنا بھارتی میڈیا کے مطابق حزب المجاہدین کے سابق کمانڈر ذاکر موسیٰ نے برہان وانی کی برسی پر کشمیری مجاہدین کی بھرتیوں کی نئی مہم چلانے کا اعلان کیا ہے۔