رضویہ سے پولیس اہلکارساتھی سمیت پکڑا گیااسلحہ اورچھینی گئی موٹرسائیکل برآمد

پولیس کا کہنا ہے کہ ملزم نارتھ کراچی سیکٹر9 میں ایک شخص سے اسلحے کے زور پر نقدی چھین کر فرار ہوا تھا. فوٹو: اے ایف پی/ فائل

---

سرسید ٹاؤن پولیس نے رضویہ تھانے کے سپاہی کو ساتھی سمیت گرفتارکرکے اسلحہ ، موٹر سائیکل اور نقدی برآمد کرلی۔

تفصیلات کے مطابق ایس ایچ او سرسید ٹاؤن الیاس شاہ نے بلال کالونی کچی آباد میں چھاپہ مار کر رضویہ تھانے کے سپاہی ذیشان اور اس کے ساتھی اصغر کو گرفتار کر کے 2 ٹی ٹی پستول ، موٹر سائیکل اور راہگیر سے چھینی ہوئی نقدی برآمد کرلی ، پولیس کا کہنا ہے کہ ملزم ذیشان علاقے میں دہشت کی علامت بنا ہوا تھا جو پولیس میں نوکری کا فائدہ اٹھا کر خواجہ اجمیر نگری اور سرسید ٹاؤن کے علاقے میں اسٹریٹ کرائم کی درجنوں وارداتوں میں ملوث رہا ہے۔

پولیس کا کہنا ہے کہ ملزم نارتھ کراچی سیکٹر9 میں ایک شخص سے اسلحے کے زور پر نقدی چھین کر فرار ہوا تھا ، ملزم نے بتایا کہ اس کی ایس پی لیاقت آباد ظفر ملک کے پاس پیشی تھی تاہم جب وہ دفتر نہیں آئے تو وہ اپنے گھر گیا اور وہاں سے وردی تبدیل کر کے اپنے ساتھی کے ہمراہ واردات کے لیے نکل گیا ملزم کو جس علاقے سے گرفتار کیا گیا ہے وہاں پر بیٹھ کر وہ شراب اور منشیات پیتا ہے جبکہ وہ خواجہ اجمیر نگری کے علاقے کا رہائشی ہے پولیس ملزم سے مزید تحقیقات کر رہی ہے۔