مائیکروسافٹ کا ’’کیلبری فونٹ‘‘ اور مریم نواز کے دستاویزات

2006 کے دستاویز میں وہ فونٹ استعمال کیے جانے کا انکشاف جو متعارف ہی 2007 میں کرایا گیا

ویب ڈیسک July 11, 2017

سماجی رابطوں کی ویب سائٹ پر حکمرانوں کے خلاف دلچسپ تبصروں کا سیلاب آگیا — فوٹو : ڈیلی پاکستان

پاناما جے آئی ٹی کی جانب سے سپریم کورٹ میں جمع کرائی جانے والی تحقیقاتی رپورٹ میں مبینہ طور پر شریف خاندان پر جعلی دستاویز جمع کرانے کا بھی الزام عائد کیا گیا ہے۔

ایکسپریس ٹریبیون کی رپورٹ کے مطابق جے آئی ٹی نے اپنی رپورٹ کے ایک حصے میں اس بات کا انکشاف کیا ہے کہ وزیراعظم نواز شریف کی صاحبزادی مریم نواز کی جانب سے جمع کرائے گئے بعض دستاویز میں مائیکروسافٹ کا ''کیلبری '' فونٹ استعمال کیا گیا ہے لیکن ان دستاویز پر 2006 کی تاریخ درج ہے جبکہ کیلبیری فونٹ 2007 میں باضابطہ طور پر متعارف کرایا گیا تھا۔

جے آئی ٹی کے اس انکشاف پر سماجی رابطوں کی ویب سائٹ پر تہلکہ مچ گیا اور ٹوئیٹر صارفین نے حکمراں جماعت اور نواز شریف کے خاندان پر تنقید کا سلسلہ شروع کردیا جس کے بعد fontgate# پاکستان میں ٹاپ ٹرینڈ بن گیا ہے۔ ایک صارف نے لکھا کہ آج سے قبل ایریل ان کا پسندیدہ فونٹ تھا تاہم اب انہیں کیلبری پسند ہے کیوں کہ اس نے حکمرانوں کی کرپشن کو بے نقاب کیا ہے۔

Oh. My. God. pic.twitter.com/LC5w13f9RX
— Zarrar Khuhro (@ZarrarKhuhro) July 10, 2017

صحافی ضرار کھوڑو نے جے آئی ٹی کی رپورٹ کا وہ حصہ ٹوئیٹ کیا جس پر لکھا ہے کہ مریم نواز نے دستاویز میں جو فونٹ استعمال کیا وہ 2007 سے قبل دستیاب ہی نہیں تھا۔ پی ٹی آئی کے رہنما ڈاکٹر عارف علوی نے بھی اس معاملے پر اپنا رد عمل ظاہر کرتے ہوئے کہا کہ اندازہ لگائیں جعلی دستاویز بنانے والوں کو یہ بات معلوم ہی نہیں تھی کہ کیلبری فونٹ 31 جنوری 2007 سے قبل موجود ہی نہیں تھا، یہ رنگے ہاتھوں پکڑے گئے ہیں۔

Imagine. The forgers of documents could not have imagined that the 'Calibri' font did not even exist before 31 Jan 2007 (caught red handed) https://t.co/zUGKPUKYqm
— Dr. Arif Alvi (@ArifAlvi) July 10, 2017

ایک صارف نے طنز کرتے ہوئے لکھا کہ اب شہباز شریف یہ کہیں گے کہ کیلبری فونٹ ہماری بیٹی مریم نواز نے ارفع کریم ٹاور لاہور میں ایجاد کیا۔ ایک اور صارف نے شہباز شریف پر تنقید کرتے ہوئے لکھا کہ وہ یہ نہ کہہ دیں کہ کیلبری فونٹ میرے ابا جان نے 1965 سے قبل ''اتفاق فونٹری'' میں بنایا تھا۔

Calibri font was made by Abba Ji in "Ittefaq Fontry" before 1965: CM Shehbaz
— Svengali (@Ronin212) July 11, 2017

ایک صارف نے مائیکروسافٹ کے بانی بل گیٹس اور وزیراعظم نواز شریف کی ماضی میں ہونے والی کسی ملاقات کی تصویر اپ لوڈ کی اور اس کا کیپشن کچھ یوں دیا کہ : مائیکرو سافٹ کے بانی بذات خود کیلبری فونٹ ایجاد کرنے پر نواز شریف کا شکریہ ادا کررہے ہیں۔