بگٹی قتل کیس سپریم کورٹ نے آفتاب شیرپاؤ کی درخواست ضمانت مسترد کردی

عدالتوں کو بدنام کرنا عادت بن گئی ہے جس کی درخواست منظور نہیں ہوتی وہ کہتا ہے انصاف نہیں ملا۔ چیف جسٹس۔ فوٹو فائل

---

اکبربگٹی قتل کیس میں سپریم کورٹ نے آفتاب شیرپاؤ کی درخواست ضمانت مسترد کردی، اس موقع پر چیف جسٹس افتخارمحمد چوہدری کا کہنا ہے کہ عدالتوں کو بدنام کرنا عادت بن گئی ہے جس کی درخواست منظور نہیں ہوتی وہ کہتا ہے انصاف نہیں ملا۔

اکبربگٹی قتل کیس میں سابق وزیرداخلہ آفتاب شیرپاؤ کی ضمانت کی درخواست کی سماعت کرتے ہوئے چیف جسٹس افتخار محمد چوہدری نے کہا کہ آفتاب شیرپاؤ انسداد دہشت گردی کی عدالت سے ضمانت لے چکے ہیں دوبارہ ضمانت لینے کی ضرورت نہیں۔

آفتاب شیرپاؤکے وکیل افتخار گیلانی نے کہا کہ ٹرائل کورٹ نے مخصوص مدت کے لئے ضمانت دی تھی گرفتاری کے احکامات جاری ہوسکتے ہیں جواب میں چیف جسٹس آف پاکستان نے ہائیکورٹ سے رجوع کرنے کا کہا جس پر افتخارگیلانی کا کہنا تھا کہ اس کا مطلب ہےان کےموکل کوجیل جاناہوگا۔

چیف جسٹس افتخار محمد چوہدری نے آفتاب شیرپاؤ کی درخواست ضمانت مسترد کرتے ہوئے کہا کہ جس کے خلاف مقدمہ بن جاتا ہے وہ کہتا ہےاس کے ساتھ ظلم ہو رہا ہے۔