کاغان میں سیاحوں کی گاڑی دریا کنہار میں جاگری 5 افراد جاں بحق

ایک دوست معجزانہ طور پر کنارے پر جا لگا، زخمی حالت میں اسپتال منتقل، 5 کی تلاش جاری

Zulfiqar Ali July 15, 2017

نارووال کے رہائشی 6 دوست وادی ناران سے واپس آ رہے تھے کہ گاڑی حادثے کا شکار ہوگئی۔ فوٹو: فائل

وادی کاغان کی سیر کیلیے آنے والے نارووال کے رہائشی دوستوں کی گاڑی ہوتر مہانڈری کے مقام پر ڈرائیور سے بے قابو ہوکر دریائے کنہار میں گر گئی جس کے نتیجے میں 5 افراد گاڑی سمیت دریا میں ڈوب گئے جبکہ ایک شخص معجزانہ طور پر محفوظ رہا۔

تھانہ کاغان پولیس اور عینی شاہدین کے مطابق گزشتہ روز نارووال کے رہائشی 6 افراد جن میں انیس، ارسلان، ندیم، حسنین، شفیق اور محمد احمد گاڑی سمیت دریا میں ڈوب گئے تاہم دریا کی لہروں نے معجزانہ طور پر محمد احمد نامی سیاح کو کنارے پر لگا دیا جسے زخمی حالت میں مقامی افراد اور پولیس نے اسپتال منتقل کر دیا۔

دوسری جانب دریائے کنہار میں ڈوبنے والوں سیاحوں اور گاڑی کی تلاش کا عمل جاری ہے تاہم آخری اطلاعات تک ان کے بارے میں کوئی پتہ نہیں چل سکا۔