یاسرشاہ نے شاداب خان کو 4 روزہ کرکٹ میچز کھیلنے کا مشورہ دے دیا

میں شاداب کے ساتھ بولنگ کرتے ہوئے فخر محسوس کرتا ہوں،ان کے پاس اچھی ورائٹی ہے، یاسر شاہ۔ فوٹو : فائل

---

یاسر شاہ نے شاداب خان کو 4روزہ کرکٹ میچزکھیلنے کا مشورہ دیدیا۔

برطانوی ویب سائٹ کو انٹرویو میں انھوں نے کہاکہ میں شاداب کے ساتھ بولنگ کرتے ہوئے فخر محسوس کرتا ہوں،ان کے پاس اچھی ورائٹی ہے،وہ گگلی، فلپر اور سلائیڈر کا بہترین استعمال کرتے ہیں۔ وقت کے ساتھ ان کی بولنگ میں مزید نکھار آتا جائے گا لیکن ٹیسٹ میچز میں بولرز کیلیے صبر آزما مراحل آتے ہیں، انھیں وکٹ کیلیے انتظار اور منصوبہ بندی کرنا پڑتی ہے، شاداب کو بھی طویل فارمیٹ کیلیے خصوصی تیاری کرنا ہوگی، لیگ اسپنر 4روزہ میچز کھیلیں تو لمبے اسپیل انھیں ٹیسٹ کرکٹ میں وکٹیں حاصل کرنے کا ہنر سیکھنے میں مدد دے سکتے ہیں۔

یاسر شاہ نے کہا کہ میں اپنی گگلی بھی بہتر بنانے کیلیے کام کررہا ہوں، کچھ ایسی گیندوں پر بھی کام جاری ہے جو حریف بیٹسمینوں کو حیران کرسکیں، سری لنکا کیخلاف یواے ای میں سیریز میں نئی ورائٹی نظر آئے گی۔

شین وارن کا جانشین ہونے کے سوال پر انھوں نے کہا کہ میں لمبی چوڑی پلاننگ نہیں کرتا، پہلا ہدف 200وکٹوں کا سنگ میل عبور کرنا ہے،کوئی بھی فارمیٹ ہو پوری کوشش ہوتی ہے کہ ٹیم کی جیت میں اہم کردار ادا کروں، ون ڈے کرکٹ میں کم بیک کرنے کا خواہاں ہوں، ڈومیسٹک کرکٹ اور لیگز میں اچھی کارکردگی سے سلیکٹرز کی توجہ حاصل کرنا چاہوں گا۔